Ronaldu faoliyatini qayerda davom ettirishiga oydinlik kiritildi
Saudiya Arabistonining “Al-Nasr” klubi va Portugaliya terma jamoasi hujumchisi Krishtianu Ronaldu faoliyatini qayerda davom ettirishiga aniqlik kiritildi.
“Arriyadiyah” nashrining xabar berishicha, Saudiya klubi futbolchi bilan shartnomani uzaytirishga kelishib olgan. Kelishuv 2026-yilgacha moʻljallangan boʻlib, shartnoma shartlari oʻzgarishsiz qolgan. Amaldagi shartnomaga koʻra, Ronaldu yiliga 200 million yevro olayotgan edi.
Futbolchining jamoa bilan amaldagi shartnomasi 2024/25-yilgi mavsum oxirigacha amal qiladi. Avvalroq OAV tomonlar shartnomani uzaytirishga kelishib olgani haqida xabar bergan edi. Yangi shartnoma shartlariga koʻra, Ronaldu klubning 5 foiz aksiyasi egasiga aylanadi.
Ronaldu faoliyatining asosiy qismini 2009-2018-yillar davomida Ispaniyaning “Real Madrid” jamoasida oʻtkazgan. Klub bilan birga u ikki marta Ispaniya chempionligini qoʻlga kiritdi, ikki marta mamlakat kubogi sohibiga aylandi, shuningdek, toʻrt marta Chempionlar ligasida gʻolib chiqdi.
2023-yilning yanvarida Ronaldu “Al-Nasr” jamoasi hujumchisiga aylangandi.
