Toshkentda 50 mingta “aqlli” suv hisoblagichi o‘rnatiladi

“Toshkent shahar suv ta’minoti” matbuot kotibi Ravshan Yoqubjonovning ma’lum qilishicha, 2025-yil oxirigacha poytaxtda 50 ming dona onlayn ishlaydigan sovuq suv hisoblagichi o‘rnatiladi. Ishlar iyul oxiridan Yangihayot tumanida boshlangan.

Qurilmalar bundan avval ikki yil davomida Shayxontohur tumanida sinovdan o‘tkazilgan. Loyiha Fransiyaning Suez kompaniyasi bilan hamkorlikda amalga oshirilmoqda va 7 yilga mo‘ljallangan.

Yangi tizim hisob-kitoblarni avtomatlashtiradi, ma’lumotlarni onlayn bazaga uzatadi, xatoliklarni kamaytiradi hamda iste’molchi va ta’minotchi o‘rtasidagi kelishmovchiliklarni bartaraf etadi. Shuningdek, shahar suv taqsimotini samarali boshqarishga imkon beradi.