Prezident Mirziyoyev Turkmanistonga tashrif buyuradi
2025-yil 4–5-avgust kunlari O‘zbekiston Respublikasi Prezidenti Shavkat Mirziyoyev Turkmanistonga amaliy tashrif bilan boradi. Ushbu tashrif BMTning Dengizga chiqish imkoni bo‘lmagan rivojlanayotgan mamlakatlar bo‘yicha uchinchi konferensiyasi doirasida amalga oshiriladi.
Tashrif Turkmaniston Prezidenti Serdar Berdimuhamedovning taklifiga binoan rejalashtirilgan.
“Avaza”da xalqaro darajadagi muloqot
Konferensiya Turkmanistonning “Avaza” milliy sayyohlik zonasida o‘tkaziladi. Unda Prezident Mirziyoyev BMT Bosh kotibi Antoniu Guterrish va boshqa xalqaro tashkilotlar, shuningdek, qator davlat rahbarlari bilan birgalikda ishtirok etadi.
Muhokama qilinadigan asosiy mavzular:
- Transport bog‘liqligini kuchaytirish
- Savdo tartib-taomillarini soddalashtirish
- Iqlim o‘zgarishiga moslashuv va ekologik xavfsizlik
- Barqaror rivojlanish yo‘lida xalqaro hamkorlikni mustahkamlash
Konferensiya yakunida “Avaza” siyosiy deklaratsiyasi va Harakatlar dasturi qabul qilinishi rejalashtirilgan.
Ikki tomonlama uchrashuvlar va mintaqaviy maslahatlar
Prezident Mirziyoyev tashrif davomida qator ikki tomonlama muzokaralarni o‘tkazadi, shuningdek, Markaziy Osiyo davlatlari rahbarlarining 7-Maslahat uchrashuviga tayyorgarlik yuzasidan alohida tadbirda ham qatnashadi.
Mazkur tashrif O‘zbekistonning mintaqaviy integratsiya va xalqaro hamkorlik sohasidagi faoliyatida navbatdagi muhim bosqich bo‘ladi.
