“Bola sotiladi” degan e’lon jamoatchilikni larzaga soldi: huquq-tartibot organlari ishga tushdi

 O‘zbekistonda mashhur onlayn e’lonlar platformasi OLX.uzda noma’lum foydalanuvchi tomonidan 3 yoshli bola “sotuvga qo‘yildi”. Bu voqea ijtimoiy tarmoqlarda keng muhokamalarga sabab bo‘ldi, huquqni muhofaza qiluvchi organlar esa holat yuzasidan zudlik bilan ish boshladi.

E’londa “Muhammad ismli bola, 3 yoshda, parvarishlangan, ozgina ovqati bor” degan mazmundagi ifodalar keltirilgan. Muallif bu ishni hazil yoki provokatsiya sifatida amalga oshirgan bo‘lishi mumkin. Biroq bunday holatlar yolg‘on axborot, omma e’tiborini chalg‘itish yoki bolaga nisbatan real xavfni yashirish ehtimoli bilan xavfli hisoblanadi.

Raqamli texnologiyalar zamonida bunday e’lonni joylashtirgan shaxsni aniqlash bir necha daqiqa ichida amalga oshiriladi. Ichki ishlar vazirligi va boshqa tegishli organlar mazkur holat yuzasidan surishtiruv ishlari boshlab yuborilganini bildirgan.

“Har qanday kulgili ko‘rinishga ega e’lon ortida real jinoyat ehtimoli yotishi mumkin. Bu esa bolalarning hayoti va huquqlari bilan bog‘liq masala bo‘lgani uchun, holatga huquqiy baho berilishi shart,” — deyiladi ichki tizim vakillarining dastlabki izohlarida.

O‘zbekiston Respublikasi Bolalar ombudsmani holat yuzasidan rasmiy bayonot bilan chiqdi. Ombudsman so‘roviga asosan, Ichki ishlar organlari tomonidan e’londagi faktlarning haqiqatga mosligi va ehtimoliy jinoyat alomatlari o‘rganilmoqda.

Bu kabi holatlar bolalar xavfsizligi va ijtimoiy ongga tahdid soluvchi omil sifatida baholanadi. Ombudsman idorasi tomonidan bu borada doimiy monitoring va nazorat choralari kuchaytirilishi ta’kidlandi.

Yosh bolalarni hazil, provokatsiya yoki boshqa niyatlarda onlayn savdo maydonlariga “mavzu” qilish — insoniylikka zid va jinoiy tusdagi harakat sifatida baholanadi. Mutasaddi tashkilotlar bunday holatlarga nisbatan qonuniy, qat’iy va prinsipial pozitsiyada turishlari lozim.