Jahon banki O‘zbekistonga 35 million dollar imtiyozli kredit ajratishga qaror qildi

Bu mablag‘ fuqarolar va bizneslar geofazoviy ma’lumotlardan (ya’ni, joylashuvga oid ma’lumotlar) foydalanishini yaxshilash uchun ishlatiladi. Loyihaning maqsadi davlat xizmatlarini raqamlashtirishni davom ettirish va mamlakatning turli hududlarini rivojlantirishga yordam berishdir.

O‘zbekiston hukumati loyiha uchun qo‘shimcha 5,7 million dollar ajratadi.

Jahon bankining Markaziy Osiyo bo‘yicha direktori Tatyana Proskuryakova shunday dedi: “Fazoviy ma’lumotlar milliy infratuzilmasi allaqachon yaxshi rivojlangan, ammo davlat xizmatlarini yanada takomillashtirish uchun ishlarni davom ettirish kerak.”

Loyiha 2025-2030 yillarda Kadastr agentligi tomonidan amalga oshiriladi va quyidagilarni o‘z ichiga oladi:

➖ Fazoviy ma’lumotlar milliy infratuzilmasini rivojlantirish;

➖ Hududiy va mahalliy darajadagi geofazoviy infratuzilmani kuchaytirish;

➖ Ko‘chmas mulk va kadastr ma’lumotlarini ro‘yxatga olish tizimini modernizatsiya qilish (UZKAD);

➖ Ob’ektlarning joylashuvi haqida yagona manzil reyestrini yaratish;

➖ Davlat va biznes o‘rtasida ma’lumot almashishni yaxshilash.