Samsung narxlarni 60 foizgacha oshirdi. Samsung Electronics noyabr oyida bir qator xotira chiplari uchun baholarni kutilmagan darajada — 60 foizgacha ko‘targan. Bu ma’lumot jarayondan xabardor manbalarga asoslanib e’lon qilingan.
Aniqlanishicha, narxlarning bunday tez va kuchli o‘sishi global sun’iy intellekt infratuzilmasiga bo‘lgan talab rezko oshib ketgani, ammo yetkazib berish zanjiridagi kechikish va uzilishlar kuchaygani bilan bog‘liq. Shu sababli sentyabr oyidan beri Samsung‘ning yirik mijozlariga taklif qilingan kontrakt narxlari izchil qimmatlab bormoqda.
Misol uchun, 32 GB DDR5 modul sentyabrda $149 bo‘lgan bo‘lsa, noyabrga kelib $239 ga chiqdi. Shuningdek:
16 GB va 128 GB modellar narxi qariyb 50 foizga oshgan;
64 GB va 96 GB variantlarda esa 30 foizdan yuqori o‘sish qayd etilgan.
Bunday o‘sish faqat server texnologiyasi bilan shug‘ullanuvchi kompaniyalarga emas, balki smartfon, noutbuk va har xil maishiy elektronika ishlab chiqaruvchilarga ham jiddiy ta’sir ko‘rsatmoqda. Ekspertlar ichki komponentlar qimmatlashayotgani tufayli yaqin oylarda tayyor qurilmalar — ayniqsa yuqori seriyali texnika — yanada qimmatlashishi mumkinligini aytishmoqda.
Samsung Electronics narxlarni oshirgani yuzasidan hozircha rasmiy izoh bermagan. Biroq kompaniya Janubiy Koreyada yangi yuqori samaradorlikka ega chip ishlab chiqarish liniyalarini ishga tushirishni rejalashtirayotgani ma’lum. Mutaxassislar bu qaror sun’iy intellekt bozorining o‘rta va uzoq muddatli o‘sish istiqbollari bilan bog‘liq ekanini ta’kidlamoqda.
Sanoat tahlilchilari Samsung 2025-yilning to‘rtinchi choragiga kelib kontrakt narxlarini yana 40–50 foizga oshirishi mumkinligini bashorat qilmoqda. Bu esa umumiy bozor kutilmalaridan qariyb 30 foizga yuqori ko‘rsatkich bo‘ladi.
Samsung Electronics, Narx Oshishi, Sun'iy Intellekt, Xotira Chiplari, Global Talab
