«Do‘stlik» postida 12,5 mlrd so‘mlik oltin kontrabandasi fosh qilindi

Farg‘ona viloyatida istiqomat qiluvchi fuqaro «Do‘stlik» chegara bojxona postida katta miqdordagi qimmatbaho metall bilan ushlab qolindi. Davlat bojxona qo‘mitasi tarqatgan ma’lumotga ko‘ra, tezkor tekshiruvlar davomida uning harakatlari shubha uyg‘otgan va natijada yirik kontrabanda holati fosh etilgan.

Tekshiruv paytida fuqaroning sumkasidan avtomobil ehtiyot qismlari chiqarib olingan. Bir qarashda oddiy detallarga o‘xshagan buyumlarning ichiga esa umumiy vazni 7,7 kilogrammni tashkil etuvchi oltin quyilmalari joylashtirilgani aniqlangan. Mutaxassislar bahosiga ko‘ra, ushbu qimmatbaho metallning umumiy qiymati taxminan 12,5 milliard so‘mga teng.

Qo‘lga olingan shaxs izoh berishicha, oltin Toshkent shahridan olib kelingan bo‘lib, uni Qirg‘iziston hududiga olib chiqish rejalashtirilgan. Bu ishda yuk mashinalari haydovchilaridan foydalanish ko‘zda tutilgani ham ma’lum qilindi. Ya’ni, sxemalar murakkab, ammo hisob-kitob — xato bo‘lib chiqdi.

Mazkur holat yuzasidan jinoyat ishi qo‘zg‘atilgan. Ayni damda huquqni muhofaza qiluvchi organlar tomonidan tergov harakatlari olib borilmoqda, shuningdek, oltin quyilmalarining haqiqiy egalari kim ekani aniqlanyapti. Xulosa bitta: chegarada «qisqa yo‘l» yo‘q, qonun baribir o‘z so‘zini aytadi.