Toshkentlik Ismoil Ahmedxo‘jayev «Dubay 24 soat» poygasida

O‘zbekiston avtosporti tarixida muhim va quvonarli voqea ro‘y bermoqda. 21 yoshli toshkentlik poygachi Ismoil Ahmedxo‘jayev 2026 yilning 17–18 yanvar kunlari bo‘lib o‘tadigan nufuzli «Dubay 24 soat» avtomarafonida ishtirok etadi. Bu haqda Rossa brendi asoschisi va taniqli avtosportchi Roman Rusinov rasman ma’lum qildi.

Ma’lum qilinishicha, Ismoil Rossa Racing jamoasi tarkibida startga chiqadi va shu orqali O‘zbekistondan chiqqan ilk poygachi sifatida Dubaydagi sutkalik chidamlilik poygasida qatnashadi. Rusinovning ta’kidlashicha, bu nafaqat Ismoilning shaxsiy yutug‘i, balki mamlakatimizda avtosportni rivojlantirish va yoshlar orasida ommalashtirish yo‘lida muhim qadam hisoblanadi.

Poygachi nufuzli musobaqada Rossa LM GT rusumli tezkor va zamonaviy superkarni boshqaradi. Ismoil ushbu avtomobilni tajribali sportchilar — Roman Rusinov, Amna Al-Kubaysi hamda Vyacheslav Gutak bilan navbatma-navbat haydaydi. Jamoa a’zolarining uyg‘unligi va tajribasi yuqori natija qayd etishga umid uyg‘otmoqda.

«Dubay 24 soat» poygasi — dunyodagi eng mashhur chidamlilik musobaqalaridan biri bo‘lib, Dubai Autodrome trassasida o‘tkaziladi. Poyga to‘liq 24 soat davom etadi va unda eng katta masofani bosib o‘tgan jamoa g‘olib deb topiladi. Musobaqada professional sportchilar bilan bir qatorda havaskor jamoalar ham ishtirok etadi, bu esa raqobatni yanada qiziqarli qiladi.

Mutaxassislar fikricha, Ismoil Ahmedxo‘jayevning ushbu startda qatnashishi O‘zbekiston avtosporti uchun yangi sahifa ochishi, yosh poygachilarga ilhom manbai bo‘lishi mumkin. Muxlislar esa yurtimiz vakilidan munosib ishtirok va munosib natija kutishmoqda.