O‘zbekiston va OTB $3 mlrd loyihalarni rejalashtirmoqda

O‘zbekiston va Osiyo Taraqqiyot Banki (OTB) umumiy qiymati $3 milliarddan oshadigan yangi loyihalarni amalga oshirishni rejalashtirmoqda. Bu haqda 18-noyabr kuni prezident Shavkat Mirziyoyev va bank rahbari Masato Kanda o‘rtasida bo‘lib o‘tgan uchrashuvda ma’lum qilindi.

Hozirda O‘zbekiston va OTB hamkorligidagi loyihalar portfeli $15 milliarddan oshib ketgan bo‘lib, OTB mintaqadagi O‘zbekistonning eng yirik hamkorlaridan biri bo‘lib qolmoqda. Tomonlar, shuningdek, 2026-yil may oyida Samarqandda o‘tkazilishi rejalashtirilgan bank Boshqaruvchilar kengashining yillik yig‘ilishini tayyorlash masalalarini ham muhokama qildilar.

Shavkat Mirziyoyev mazkur tadbir doirasida kengaytirilgan strategik hamkorlikning yangi dasturini imzolashni taklif etdi. Ushbu dastur infratuzilmani rivojlantirish, muhandis va texnik xodimlarni tayyorlash, ayollar va yoshlarga ta’lim berish, kambag‘allikni kamaytirish, ipoteka va xususiy sektorni rivojlantirish kabi yo‘nalishlarni qamrab oladi.