Qozog‘iston sudi qarori: 16 yoshli "urushga qarshi" o‘smir deportatsiya qilinadi!
Qozog‘iston Respublikasi sudi urushga qarshi qarashlari tufayli Rossiyadan qochib, chegarani piyoda kesib o‘tgan 16 yoshli rossiyalik o‘smir Timur Turkovni mamlakatdan chiqarib yuborish (deportatsiya qilish) haqida qaror qabul qildi. Bu haqda 15-dekabr, dushanba kuni The Insider nashri xabar berdi. "Uralskaya nedelya" nashrining ma’lumotlariga ko‘ra, Turkov so‘nggi uch oy mobaynida Uralsk shahridagi bolalar uchun ijtimoiy markazda bo‘lgan.
Sudning keskin hukmi
"Uralskaya nedelya" e’lon qilgan videoda o‘smirning o‘zi sud majlisi Uralskdagi “2-shahar sudi”da 5-dekabr kuni bo‘lib o‘tganini, 8 dekabr kuni esa uni Rossiyaga majburiy yuborish to‘g‘risida qaror chiqarilganini aytgan.
- Ayblov: Sud Timur Turkovni chegarani noqonuniy kesib o‘tishda aybdor deb topdi.
- Jazo: Unga Qozog‘istonga 5 yil muddatga kirish taqiqlandi va sud qaroriga ko‘ra, o‘smir Rossiyada yana 6 oy "erkinlikni cheklash" jazosini ham o‘tashi kerak.
"Mediazona" nashri aniqlashicha, Turkov ishini G‘arbiy Qozog‘iston viloyati voyaga yetmaganlar ishlari bo‘yicha ixtisoslashgan tumanlararo sudi ko‘rib chiqqan.
Urush targ‘ibotidan qochish
“Prosto jurnalistika” loyihasi yozishicha, Timur Turkov Komi Respublikasining Letka qishlog‘ida bobosi va buvisi bilan yashagan. Otasi oiladan ketgan, onasi esa 3 yil avval koronavirus oqibatlari sabab vafot etgan. 2025 yil yozida o‘smir 9-sinfni tugatgan va Rossiyadan chiqib ketishga qat’iy qaror qilgan. Turkovning aytishicha, bu qarorga uni "urush targ‘iboti" majbur qilgan.
Timur Turkov: “Rossiyada maktablar militarizatsiya qilinyapti. Ayniqsa bizda maktabda katta sinf o‘quvchilarini Rossiya–Ukraina urushida halok bo‘lgan harbiylarni dafn marosimlariga jalb qilishardi. Qishlog‘imizdan 11 yoki 12 kishi o‘lik qaytdi, besh kishi bedarak yo‘qoldi”.
O‘smir Rossiyaga qaytsa, siyosiy qarashlari tufayli xavf ostida qolishdan qo‘rqishini aytgan. “Rossiyada hamma narsa cheklanyapti: erkin va mustaqil OAV cheklanyapti, aholi ustidan total nazorat joriy qilinyapti”, — deya o‘z xavotirlarini qo‘shimcha qilgan u.
Piyoda o‘tilgan chegara
"Uralskaya nedelya" xabar qilishicha, Turkov joriy yil sentyabr oyida Komi Respublikasidan Qozog‘istonga avtostop bilan qochgan. Uning maqsadi "RFning siyosiy yo‘nalishiga rozi emasligi, 18 yoshga to‘lgach urushga jo‘natilishi mumkinligidan qo‘rqishi tufayli qochqin maqomini so‘rash" bo‘lgan.
U chegarani 12 sentyabrga o‘tar kechasi 658-chegara belgisi yaqinidan piyoda kesib o‘tgan. O‘smirning so‘zlariga ko‘ra, u tun davomida taxminan 17 kilometr yo‘l bosgan, hatto bir payt charchoq va suvsizlanish sabab hushidan ketgan.
Keyinroq Turkovni qozog‘istonlik chegarachilar topib, o‘tkazish punktiga olib borgan. U yerga Rossiya konsulxonasi vakillari, RF chegara xizmati xodimlari va hatto Rossiyaning qo‘shni aholi punktidan maktab psixologi ham kelgan. Turkov jurnalistlarga uni Rossiya FSB polkovnigi ham so‘roq qilganini aytgan. Shundan so‘ng o‘smir ijtimoiy xizmatlarga muhtoj bolalar markaziga joylashtirilgan.
