FIFA o‘yinlari Netflix orqali yangi formatda qayta jonlanadi

Futbol muxlislari uchun kutilgan yangilik: FIFA brendi ostida ishlab chiqilgan videoo‘yinlar 2026 yilda mutlaqo yangi ko‘rinishda yana sahnaga qaytadi. BBC tarqatgan ma’lumotlarga ko‘ra, ushbu o‘yinlarni ishlab chiqish va nashr etish huquqi Netflix platformasiga o‘tgan.

Yangi loyiha Delphi Interactive studiyasi rahbarligida amalga oshiriladi va 2026 yilgi futbol bo‘yicha Jahon chempionati arafasida taqdim etilishi rejalashtirilgan. E’tiborlisi, o‘yin Netflix obunachilari uchun mutlaqo bepul bo‘ladi. U iOS va Android smartfonlarida, shuningdek, ayrim zamonaviy televizor modellarida ishga tushiriladi.

O‘yin jarayonini boshqarish uchun alohida geympad talab etilmaydi — barcha nazorat smartfon orqali amalga oshiriladi. Bu esa Netflix’ning interaktiv kontentga bo‘lgan yondashuvini yanada kuchaytirishga qaratilgan qadam sifatida baholanmoqda.

Ma’lumot uchun, FIFA o‘yinlari qariyb 30-yil davomida Electronic Arts tomonidan ishlab chiqilgan edi. Biroq 2023 yilda litsenziya shartlari bo‘yicha kelishmovchiliklar sabab EA va FIFA yo‘llarini ajratishdi. Shundan so‘ng, EA o‘z loyihasini EA Sports FC brendi ostida davom ettirdi. Nom o‘zgarishiga qaramay, EA FC 24 o‘yini tijoriy jihatdan juda muvaffaqiyatli chiqib, 2023 yilda Buyuk Britaniyada eng ko‘p sotilgan o‘yin bo‘ldi.

FIFA prezidenti Janni Infantino esa Netflix bilan tuzilgan yangi hamkorlikni “raqamli futbol tarixida yangi sahifa” deb atadi. Uning ta’kidlashicha, bu format futbol o‘yinlarini global auditoriyaga yanada yaqinlashtiradi.

Shu bilan birga, muxlislar orasida fikrlar ikkiga bo‘lingan. Ayrimlar FIFA o‘yinlarining asosan mobil platformalarga yo‘naltirilganidan xavotir bildirmoqda. Ammo bir narsa aniq: futbol va raqamli texnologiyalar uyg‘unligi yana bir bor katta muhokamalarga sabab bo‘lmoqda.