Elmurod Haqnazarov Alash Pride turnirida tezkor g‘alaba qozondi (video)

Ayni damda Qozog‘istonning Olmota shahri MMA muxlislari e’tibor markazida. Bu yerda nufuzli “Alash Pride 115” turniri bo‘lib o‘tmoqda va musobaqa doirasida yurtimiz uchun yana bir quvonchli lahza qayd etildi.

Turnirning eng qiziq janglaridan birida hamyurtimiz, ijtimoiy tarmoqlarda hazilomuz videolari bilan tanilgan bloger Elmurod Haqnazarov oktgonga ko‘tarildi. Uning raqibi esa tajribali braziliyalik jangchi Diyego Lopes bo‘ldi. Ko‘pchilik bu to‘qnashuv uzoq va murosasiz kechishini taxmin qilgan edi, ammo voqealar umuman boshqacha yo‘nalish oldi.

Jangning birinchi raundiyoq barcha savollarga javob berdi. Elmurod Haqnazarov tezkor harakatlar, aniq hisob va tajribaga tayanib, raqibini sabmishn orqali taslim etishga majbur qildi. Oktagonda uzoq kurashga ehtiyoj qolmadi — hamyurtimiz ishni juda ishonchli va sovuqqonlik bilan yakunladi.

Qizig‘i shundaki, Elmurod Haqnazarov ishtirok etgan janglarda vaqt borgan sari “tejalib” borayotgandek. Bu safar ham u ortiqcha shovqinsiz, osongina qulflab, raqibini bo‘g‘ish usuli bilan mag‘lub etdi. Hisob esa 2:0 ko‘rinishiga keldi.

39 yoshda ham MMAda jang qilish, qolaversa, shunday ishonchli g‘alabalar qayd etish mumkin ekani Elmurod Haqnazarov misolida yana bir bor isbotlanmoqda. Muxlislar esa hazil bilan aytmoqda: yosh — raqam xolos, agar xarakter va mehnat bo‘lsa.

Shubhasiz, bu g‘alaba nafaqat jangchi uchun, balki uni qo‘llab-quvvatlab kelayotgan minglab muxlislar uchun ham katta motivatsiya bo‘ldi. Alash Pride oktagonida O‘zbekiston bayrog‘i yana bir bor baland ko‘tarildi.