Toshkentda tundagi YTH natijasida bir yo‘lovchi halok bo‘ldi

Toshkent shahrida sodir bo‘lgan navbatdagi yo‘l-transport hodisasi fojiali oqibat bilan yakunlandi. Bugun, 20 dekabr kuni poytaxtning Yashnobod tumanida Lacetti va Nexia-3 rusumli avtomashinalar o‘zaro to‘qnashib ketdi va oqibatda Nexia avtomashinasida bo‘lgan yo‘lovchi halok bo‘ldi. Bu haqda Toshkent shahar Yo‘l harakati xavfsizligi boshqarmasi ma’lum qildi.

Rasmiy axborotga ko‘ra, hodisa taxminan soat 03:45 larda Yashnobod tumanidagi Mahdumquli ko‘chasida yuz bergan. 2004 yilda tug‘ilgan Lacetti haydovchisi harakat vaqtida rul boshqaruvini yo‘qotib, avtomashina yo‘lning qarama-qarshi qismiga chiqib ketgan. Natijada u 1977 yilda tug‘ilgan S.A. boshqaruvidagi Nexia-3 rusumli transport vositasi bilan to‘qnashgan.

Yo‘l-transport hodisasi oqibatida Nexia-3 avtomashinasida bo‘lgan yo‘lovchi og‘ir tan jarohatlari olib, voqea joyida vafot etgan. Shuningdek, har ikki avtomashina haydovchisi ham turli darajada jarohat olib, shifokorlar tomonidan ularga birinchi tibbiy yordam ko‘rsatilgan.

Hodisa yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi, ya’ni transport vositalari harakati yoki ulardan foydalanish xavfsizligi qoidalarini buzishning 2-qismi bilan jinoyat ishi qo‘zg‘atildi. Ayni paytda ushbu holat bo‘yicha tergov harakatlari davom etmoqda.