Tramp Meksika va Venesuela bo‘yicha keskin bayonot berdi

AQSH prezidenti Donald Tramp Vashingtondagi navbatdagi matbuot anjumanida qaytadan xalqaro e’tibor markaziga chiqdi. Uning Meksika va Venesuelaga oid keskin bayonotlari nafaqat siyosiy doira, balki mintaqadagi vaziyatni kuzatib borayotgan barcha tomonlarda jiddiy muhokamalarni keltirib chiqardi.

Tramp Meksika hududida narkotrafikka qarshi kurash samarasiz ekanini ta’kidlar ekan, zarurat tug‘ilsa, narkotik oqimini to‘xtatish uchun ushbu davlat hududiga zarba berish ehtimolini inkor etmadi. Uning ta’kidlashicha, narkotik aylanmasini cheklashda AQSH “kerak bo‘lgan har qanday chorani ko‘rish”ga tayyor. Prezident jurnalistlar savoliga javob berar ekan, bunday operatsiyani amalga oshirish “u uchun iftixor bo‘lishi mumkinligini” ham yashirmadi, chunki bu orqali millionlab odamlarning hayotini saqlab qolish mumkinligini qayd etdi.

Shu bilan birga, Karib hududida AQSH harbiy mavjudligining kuchayishi ham vaziyatni yanada taranglashtirmoqda. Avgust oyidan beri Amerika harbiy kemalari Lotin Amerikasidagi narkotrafikka qarshi kurash maqsadida doimiy patrul olib bormoqda. Bu ortiqchalik ba’zi davlatlarda xavotir uyg‘otgan bo‘lsa, yana boshqalarda siyosiy bahslarni kuchaytirdi.

Tramp Venesuela borasida ham keskin fikrlarini bildirib o‘tdi. Uning aytishicha, kerak bo‘lsa AQSH qo‘shinlari Venesuela hududiga kirishi ehtimoli bor va bu variantni “hech narsa istisno qilinmasligi” bilan izohladi. Shunga qo‘shimcha ravishda, Maduro rejimi minglab venesuelaliklarni, hatto turma mahbuslarini ham AQSHga yo‘naltirayotgani haqida jiddiy ayblovlar bildirdi.

Bu bayonotdan bir necha soat o‘tmay, Venesuela prezidenti Nikolas Maduro haqiqiy diplomatik muhit yaratishga urindi — u AQSHda “Venesuela bilan muloqot qilmoqchi bo‘lgan istalgan shaxs” bilan yuzma-yuz suhbatga tayyorligini e’lon qildi. Ammo u Vashingtonning hozirgi siyosatini tanqid qilib, Amerika hukumati Karakasda hokimiyatni almashtirishga intilayotganini ta’kidladi.

Bir vaqtning o‘zida, Trinidad va Tobago hukumati o‘z pozitsiyasini aniq bayon qildi: ular hech qachon o‘z hududini Venesuelaga zarba berish uchun taqdim etmaydi, shuningdek AQSH ham bu borada rasman so‘rov bildirmaganini ma’lum qildi. Arxipelagda o‘tkazilayotgan Amerika dengiz piyoda qo‘shinlari mashg‘ulotlari esa nafaqat Venesuela, balki qator mintaqaviy davlatlarda ham turlicha fikrlarga sabab bo‘lmoqda.

Vashington Venesuela rahbariyatini “terroristik narkokartel” bilan bog‘liqlikda ayblayotgan bir vaqtda, Maduro bu da’volarni keskin rad etmoqda. Shu bilan birga, sentyabr oyidan beri AQSH harbiylari xalqaro suvlarda narkotik tashishda gumon qilingan kemalarga havodan zarbalar berib kelmoqda, natijada kamida 80 dan ortiq odam halok bo‘lgani aytilmoqda.

Mintaqadagi vaziyat tobora murakkablashib borar ekan, Trampning har bir bayonoti yangi siyosiy to‘lqinlarni keltirmoqda. Mutassadilar esa asosiy muammo — narkotrafik, migratsiya va xavfsizlik masalalarini muloqot orqali hal qilish ehtiyoji yanada kuchayganini ta’kidlamoqda.