Xitoylik tadqiqotchilar ayollarda yosh o‘tgan sari homiladorlik imkoniyati pasayishining asosiy sababini aniqlab, uni bartaraf etishga qaratilgan yangi terapiyani namoyish etdi. Bu haqda Xinhua agentligi ma’lum qildi.
Tadqiqot Nankay universiteti rahbarligidagi mutaxassislar tomonidan amalga oshirilgan va uning natijalari Cell Reports Medicine jurnalida e’lon qilindi. Olim Li Szening ta’kidlashicha, ilgari e’tibordan chetda qolgan bir omil — ribosomal disfunksiya — tuxum sifatining yomonlashuvida hal qiluvchi rol o‘ynashi aniqlangan.
Ma’lumotlarga ko‘ra, 35 yosh atrofida ribosomal genning ortiqcha faolligi boshlanadi. Bu normal oqsil sintezining buzilishiga, xromosomalar ajralishida xatolarga va, oqibatda, embrion rivojlanishining susayishiga olib keladi.
Olimlar shu jarayonni barqarorlashtirish maqsadida ribosomal translyatsiyani sekinlashtiruvchi rapamitsin dori vositasini sinovdan o‘tkazdi. Qisqa davom etgan terapiya ribosomal faollikni pasaytirib, oqsil muvozanatini tikladi va tuxum sifatini yaxshiladi.
Kichik klinik sinovlar ham ijobiy natija berdi: bir nechta ayollar davolashdan so‘ng yuqori sifatli blastotsistlarga erishdi, bu esa muvaffaqiyatli homiladorlik va sog‘lom chaqaloq tug‘ilishi ehtimolini oshirdi.
Shansi bolalar shifoxonasi vakili U Syuysin mazkur natijalarni "umidli qadam" deya baholab, bu usul yoshga bog‘liq bepushtlikni tushunish va davolashda yangi davrni ochishi mumkinligini ta’kidladi. Ammo preparatning to‘liq samaradorligini tasdiqlash uchun yanada keng qamrovli klinik tadqiqotlar talab etiladi.
Xitoy Tadqiqotchilari, Homiladorlik Imkoniyati, Ribosomal Disfunksiya, Tuxum Sifati, Klinika Sinovlari
