Rabyo: «Milan» mag'lubiyatiga hakamlar emas, o'zimiz aybdormiz

«Milan» yarim himoyachisi Adrien Rabyo Italiya Superkubogi yarim finalida «Napoli»ga qarshi o'yindagi (0:2) mag'lubiyat yuzasidan fikr bildirdi. Uchrashuvda «rossonerilar» har ikki taymda bittadan gol o'tkazib yubordi.

«Napoli» safida David Neres va Rasmus Xoylund gol urdi. «Biz avvalgi ixchamligimizni qaytarishimiz kerak — so'nggi paytlarda bu jihat yetishmayapti.

Himoyadagi o'yin ko'ngildagidek emas, hujumda esa vaziyatlardan yaxshiroq foydalanishimiz zarur. Biz xotirjamlikni saqlashimiz kerak.

Albatta, bu og'riqli, chunki sovrin uchun kurashmoqchi edik. Biroq A Seriyada ishlarimiz hanuz yaxshi», — dedi Rabyo.

U futbolchilar yutqazishni hakamlar faoliyati bilan izohlash noto'g'ri ekanini ta'kidladi: «Bugun biz hakamlik sabab yutqazmadik — ayb o'zimizda. Ancha yaxshi o'ynashimiz mumkin edi, ammo uddalay olmadik.

Bunday holatlar bo'lib turadi, bu dunyoning oxiri emas». 28 dekabr kuni «Milan» A Seriya doirasida o'z maydonida «Verona»ni qabul qiladi.

Adrien Rabyo, Italiya Superkubogi, Milan klubi, Napoli jamoasi, A Seriya