Green Card vizasi vaqtincha to‘xtatilishi bahslarga sabab bo‘ldi

AQSH Ichki xavfsizlik vaziri Kristi Noyem mamlakatda keng muhokamalarga sabab bo‘lgan qarorni e’lon qildi. U X ijtimoiy tarmog‘idagi sahifasi orqali AQSH Fuqarolik va immigratsiya xizmatlariga DV1 vizasi dasturini vaqtincha to‘xtatish bo‘yicha rasmiy ko‘rsatma berilganini ma’lum qildi. Mazkur viza har yili o‘tkaziladigan Green Card lotereyasi g‘oliblariga AQSHga qonuniy ravishda immigratsiya qilish imkonini berib kelar edi.

Ma’lumot uchun, DV1 dasturi orqali har yili taxminan 50 ming nafar xorijiy fuqaro AQSHga ko‘chib o‘tish huquqini qo‘lga kiritadi. Lotereyada ishtirok etish uchun kamida o‘rta ma’lumotga ega bo‘lish yoki ikki yillik ish tajribasini tasdiqlash talab qilinadi. Ushbu tizim ko‘plab mamlakatlar fuqarolari uchun AQSHga kirishning eng ochiq va shaffof yo‘llaridan biri hisoblanib kelgan.

Kristi Noyem o‘z bayonotida qarorga sabab bo‘lgan xavfsizlik omillariga alohida to‘xtalib o‘tdi. Uning aytishicha, 2017 yilda DV1 vizasi orqali AQSHga kelgan Portugaliya fuqarosi Klaudio Manuyele Neveshe Valente Braun universitetining ikki talabasi o‘limi bilan bog‘liq ishda gumonlanmoqda. Ushbu fojiali hodisa vaqtida O‘zbekiston fuqarosi Muhammadaziz Umurzoqov ham halok bo‘lgani qayd etildi.

Shuningdek, vazir yana bir og‘ir voqeani esga oldi. Uning so‘zlariga ko‘ra, 2017 yilda Nyu-York shahrida sakkiz nafar insonning hayotiga zomin bo‘lgan teraktni amalga oshirgan Sayfullo Soipov ham aynan shu vizalar dasturi orqali AQSHga kirib kelgan. CBS nashri xabar berishicha, AQSH prezidenti Donald Tramp ham uzoq yillar davomida DV1 lotereyasiga qarshi chiqib kelgan siyosatchilardan biri hisoblanadi.

Trampning fikricha, bunday ochiq immigratsiya dasturlari mamlakat ichki xavfsizligiga jiddiy tahdid solishi mumkin. Shu bilan birga, dastur tarafdorlari bu qarashga qo‘shilmaydi. Ular DV1 vizasi AQSH iqtisodiyotiga mehnat bozori orqali ijobiy ta’sir ko‘rsatishini, shuningdek, mamlakatning xalqaro nufuzini oshirishga xizmat qilishini ta’kidlashmoqda.

Ayni paytda mazkur qaror vaqtinchalik ekani aytilmoqda. Biroq u immigratsiya siyosati atrofidagi bahslarni yanada kuchaytirib, Green Card lotereyasi kelajagi borasida yangi savollarni kun tartibiga chiqardi.