«Real» Kubokdagi safarni Talaverada boshlaydi: tarkib ma’lum

Ispaniya Kubogining 1/16 final bosqichida Madridning «Real» klubi quyi divizion vakili «Talavera» mehmoni bo‘ladi. Qiziqarli to‘qnashuv 17 dekabr kuni Talavera shahrida bo‘lib o‘tadi va Toshkent vaqti bilan soat 01:00 da start oladi. Ushbu bahsni muxlislar FutbolTV hamda Zo‘rTV telekanallari orqali jonli efirda tomosha qilishlari mumkin.

Uchrashuv oldidan «qirollik klubi»ning boshlang‘ich tarkibi e’lon qilindi. Xabi Alonso Kubok o‘yinida ayrim yetakchi futbolchilarga dam berib, bir qator yosh va kam o‘ynayotgan ijrochilarga imkoniyat taqdim etmoqda. Darvozada Andrey Lunin maydonga tushadi. Himoya chizig‘ida Ximenes, Heysen, Karreras va Fran Garsiya joy olgan.

Yarim himoyada Mastantuono, Sebalos hamda Arda Guler o‘yinni boshlaydi. Hujumda esa muxlislar e’tibori asosan Kilian Mbappega qaratilgan. Unga yordamchi sifatida yosh iste’dod Endrik va Gonsalo Garsiya harakat qiladi.

Zaxira o‘rindig‘ida ham ancha kuchli nomlar jamlangan. Jumladan, Bellinghem, Vinisius Junior, Rodrigo va Chuameni kabi futbolchilar kerak bo‘lsa, o‘yin taqdirini o‘zgartirishga tayyor. Bu esa «Real»ning Kubok bahsiga jiddiy yondashganini ko‘rsatadi.

«Talavera» uchun bu bellashuv tarixiy ahamiyatga ega bo‘lsa, «Real» uchun Ispaniya Kubogidagi navbatdagi qadam hisoblanadi. Qog‘ozda madridliklar favorit sanalsa-da, Kubok o‘yinlarida syurprizlar tez-tez uchrab turishi hech kimga sir emas. Shu bois bu to‘qnashuv ham muxlislarga qiziqarli va kurashlarga boy futbol taqdim etishi kutilmoqda.