«Napoli» qoqildi, «Fiorentina» yana alamli mag‘lubiyatga uchradi (video)

Italiya A seriyasining 15-turi bir qator kutilmagan natijalar bilan yodda qoldi. Chempionlik poygasida jiddiy kurash olib borayotgan «Napoli» safarda ochkolar yo‘qotib, turnir jadvalida peshqadamlikka chiqish imkoniyatini qo‘ldan boy berdi.

Neapolliklar «Udineze» maydonida faol harakat qildi, ammo uchrashuv davomida yaratilgan imkoniyatlar samaraga aylanmadi. O‘yin taqdirini 73-daqiqada Ekkelenkamp tomonidan kiritilgan yagona gol hal qildi. Shu tariqa, «Napoli» minimal hisobda mag‘lub bo‘lib, 31 ochko bilan ikkinchi o‘rinda qolib ketdi va 1-pog‘onaga ko‘tarilish imkoniyatini amalga oshira olmadi.

Maydon egalari esa intizomli o‘yin va mustahkam himoya orqali qimmatli g‘alabani qo‘lga kiritib, o‘z pozitsiyalarini yaxshilashga erishdi. «Udineze» uchun bu natija turnir jadvalida yanada ishonchli qadam bo‘ldi.

Udineze — Napoli 1:0

Gol: Ekkelenkamp (73).

Udineze — Okoye, Bertola (Exizibue, 84), Zaniolo (Bravo, 90+1), Devis (Buksa, 83), Zanoli (Goglichidze, 90+1), Kabasele, Karlstrom, Kristensen, Petrovskiy, Sole, Ekkelenkamp (Zarraga, 83).

Napoli — Milinkovich-Savich, Buonjorno (Oliveyra, 75), Bekema (Politano, 61), Di Lorenso, Spinatssola (Gutiyerres, 83), Rahmani, Maktominey, Neres, Lang (Lobotka, 61), Elmaz (Lukka, 83), Hoylund.

Ogohlantirish: Zaniolo (33).

Turning yana bir bahsli o‘yini Florensiyada bo‘lib o‘tdi. Mavsum davomida g‘alaba nimaligini unutgan va jadvalning eng quyi qismida qolib ketgan «Fiorentina» o‘z maydonida «Verona»ni qabul qildi. Mezbonlar umid bilan boshlagan bahs yana alamli ssenariyda yakunlandi.

Uchrashuvda hisob avtogol orqali ochilgan bo‘lsa-da, «Verona» oxirigacha kurashib, Orbanning ikkita aniq zarbasi evaziga g‘alabani ilib ketdi. Ayniqsa, 90+3-daqiqada urilgan hal qiluvchi gol «Fiorentina» muxlislari uchun og‘ir zarba bo‘ldi.

Fiorentina — Verona 1:2

Gollar: Nunes (69, avtogol) — Orban (42, 90+3).

Shu tariqa, 15-tur natijalari A seriyasidagi raqobat yanada keskinlashayotganini ko‘rsatdi. Ayrim jamoalar imkoniyatni boy bersa, boshqalari aynan shunday o‘yinlarda o‘z so‘zini aytayotgani mavsumning qiziqarli kechayotganidan darak beradi.