FIFA yilning eng yaxshilarini aniqlash jarayonini davom ettirmoqda. Jahon futbol jamoatchiligi katta qiziqish bilan kutayotgan an’anaviy taqdirlash marosimi joriy yil 16 dekabr kuni bo‘lib o‘tadi. Ushbu tantanali kechada mavsum davomida eng yuqori saviyada o‘yin namoyish etgan futbolchilar e’tirof etiladi.
Yil yakunlariga ko‘ra, mavsumning eng yaxshi futbolchisi unvoni uchun 11 nafar yulduzli o‘yinchi da’vogar sifatida ro‘yxatga kiritildi. Ular orasida klublar o‘rtasidagi jahon chempionati g‘oliblari, Yevropa Chempionlar ligasida zafar quchgan jamoa yetakchilari hamda Millatlar ligasida chempion bo‘lgan futbolchilar bor. Qisqasi, ro‘yxat faqat nomiga emas, natija va ta’sirga boy.
FIFA tomonidan e’lon qilingan nomzodlar quyidagilar:
1. Koul Palmer
2. Pedri
3. Usmon Dembele
4. Vitinya
5. Lamin Yamal
6. Xarri Keyn
7. Nuno Mendesh
8. Ashraf Hakimi
9. Muhammad Saloh
10. Kilian Mbappe
11. Rafinya
Bu futbolchilarning har biri joriy mavsumda o‘z klubi yoki milliy jamoasida hal qiluvchi rol o‘ynadi. Kimdir hal qiluvchi gollari bilan, kimdir assistlari, barqaror o‘yini yoki yetakchilik fazilatlari bilan muxlislar e’tiborini tortdi. Ayniqsa, yosh yulduzlar va tajribali liderlar bir ro‘yxatda jamlangani sovrin uchun raqobatni yanada qiziqarli qilmoqda.
Mutaxassislar fikricha, joriy yilgi ovoz berish natijalari kutilmagan syurprizlarga ham boy bo‘lishi mumkin. Chunki nomzodlar orasida nafaqat an’anaviy favoritlar, balki mavsum kashfiyotiga aylangan futbolchilar ham bor.
Eslatib o‘tamiz, o‘tgan yil FIFA’ning eng nufuzli individual sovrini “Real Madrid” vingeri Vinisius Juniorga nasib qilgan edi. Bu gal esa kim g‘olib bo‘ladi — javobini 16 dekabr kuni butun futbol olami birgalikda bilib oladi.
FIFA taqdirlashi, Jahon futboli, Eng yaxshi futbolchi, Yevropa Chempionlar ligasi, Millatlar ligasi
