Qurilish obyektlari haqida ochiq ma’lumot beruvchi yangi interaktiv xarita

Qurilish va uy-joy kommunal xo‘jaligi vazirligi tashabbusi bilan fuqarolar uchun yana bir qulay raqamli yechim ishga tushirildi. Endi mamlakat bo‘ylab olib borilayotgan qurilish ishlari haqida batafsil ma’lumotni maxsus interaktiv xarita orqali olish mumkin.

Mazkur xizmatdan foydalanish uchun DSHQ.shaffofqurilish.uz platformasiga kirish kifoya. Saytda foydalanuvchi tanlagan hudud interaktiv xaritada alohida ranglar bilan belgilangan zonalar ko‘rinishida namoyon bo‘ladi. Bu esa qurilish holatini bir qarashda tushunish imkonini beradi.

Xaritadagi barcha obyektlar uchta asosiy toifaga ajratilgan. Qizil rangda qurilishi to‘xtatilgan obyektlar aks ettiriladi. Ko‘k rangda ayni paytda qurilish jarayoni davom etayotgan loyihalar ko‘rsatiladi. Qora rang esa butunlay muzlatilgan yoki bekor qilingan qurilish ishlarini anglatadi.

Qo‘shimcha ravishda, xarita orqali har bir obyekt joylashgan hududning seysmik darajasini ham ko‘rish mumkin. Bu ayniqsa yangi uy-joy sotib olishni yoki qurilishga qiziquvchi fuqarolar uchun muhim axborot hisoblanadi.

Vazirlik ma’lumotlariga ko‘ra, hozirga qadar 20 milliondan ortiq aholi istiqomat qiladigan hududlar to‘liq raqamlashtirilgan. Kelgusida ushbu interaktiv tizim yanada kengaytirilib, aholi uchun ochiqlik va shaffoflikni kuchaytirishga xizmat qilishi kutilmoqda.