Yaponiya va O‘zbekiston o‘rtasida sayohat oqimi jadal ortmoqda

2025 yilning yanvar–noyabr oylari davomida Yaponiya tomonidan qabul qilingan o‘zbekistonliklar soni sezilarli darajada oshdi. Milliy statistika qo‘mitasi ma’lumotlariga ko‘ra, ushbu davrda Quyosh chiqish mamlakatiga 2,7 ming nafar O‘zbekiston fuqarosi tashrif buyurgan. Bu ko‘rsatkich o‘tgan yilning shu davri bilan taqqoslaganda 16,2 foizga yuqori. Ya’ni, yapon yo‘nalishi o‘zbekistonliklar orasida tobora ommalashib bormoqda.

Safarlarning asosiy qismi sayyohlik maqsadida amalga oshirilgan. Xususan, 2,2 ming nafar fuqaro Yaponiyaga aynan dam olish va mamlakat bilan yaqindan tanishish uchun borgan. Shu bilan birga, 294 kishi qarindosh-urug‘larini ziyorat qilishni maqsad qilgan bo‘lsa, yana 137 nafar yoshlar ta’lim olish niyatida Yaponiyani tanlagan. Bu esa o‘zbekistonlik yoshlar orasida yapon ta’lim tizimiga qiziqish ham ortganini ko‘rsatadi.

Qizig‘i, harakat faqat bir tomonlama emas. Shu vaqt oralig‘ida O‘zbekistonga ham qariyb 30 ming nafar yaponiyalik tashrif buyurgan. Bu o‘tgan yilga nisbatan salkam 41,1 foizga ko‘p. Ulardan mutlaq ko‘pchiligi — 27,6 ming kishi sayyoh sifatida kelib, mamlakatimiz tarixi, madaniyati va me’moriy obidalari bilan tanishgan.

Bundan tashqari, 1,5 ming nafar yaponiyalik qarindoshlarini ko‘rish uchun kelgan bo‘lsa, 784 kishi ish yuzasidan, yana 71 nafar fuqaro esa o‘qish maqsadida O‘zbekistonga tashrif buyurgan. Ushbu raqamlar ikki davlat o‘rtasidagi aloqalar nafaqat turizm, balki ta’lim va mehnat sohalarida ham faol rivojlanayotganini ko‘rsatadi. Qisqasi, O‘zbekiston va Yaponiya o‘rtasidagi bordi-keldi trendda — va bu hali boshlanishi, deyish mumkin.