1 200 dan ortiq qalbaki haydovchilik guvohnomasi aniqlandi

Bir yil davomida soxta haydovchilik guvohnomalarini rasmiylashtirish bilan shug‘ullangan jinoiy guruh fosh etildi. Tergov jarayonida mazkur noqonuniy faoliyatda Davlat xizmatlari markazining bir nafar xodimi ham ishtirok etgani aniqlandi. Ular 72 nafar fuqaroga qalbaki hujjatlar tayyorlab berib, buning evaziga jami 616 million so‘m miqdorida noqonuniy daromad olgan.

Jinoiy guruh haydovchilik guvohnomalarini ikki xil usulda rasmiylashtirib bergan. Birinchi holatda, 500–1000 AQSh dollari evaziga eski turdagi haydovchilik guvohnomalari qo‘lbola tarzda tayyorlanib, pora berish orqali yangi namunadagi guvohnomalarga almashtirilgan. Ikkinchi usulda esa, 10 ming AQSh dollarigacha bo‘lgan mablag‘ evaziga Yo‘l harakati xavfsizligi bo‘limlari nomidan soxta ma’lumotnomalar va QR-kodlar tayyorlangan.

Mazkur soxta hujjatlar tuman Davlat xizmatlari markazlariga taqdim etilib, mansabdor shaxslarning noqonuniy harakatlari orqali haydovchilik guvohnomalari rasmiylashtirilgan. Bosh prokuratura tomonidan hududlarda o‘tkazilgan qo‘shimcha tekshiruvlar natijasida yana 1 200 dan ortiq qalbaki haydovchilik guvohnomalari aniqlangan.

Hozirda qalbaki hujjatlar asosida olingan barcha haydovchilik guvohnomalari belgilangan tartibda bekor qilingan. Qonunbuzarlikda ishtirok etgan shaxslar, shuningdek, soxta hujjatlarni bilib turib sotib olgan fuqarolarga nisbatan jinoiy javobgarlik masalasi ko‘rib chiqilmoqda.