Firibgarlikda gumonlangan advokat tezkor tadbirda ushlandi

Toshkent shahrida faoliyat olib borayotgan advokatga nisbatan jinoyat ishi qo‘zg‘atildi. Bu Davlat xavfsizlik xizmatining Toshkent shahar bo‘yicha boshqarmasi hamda Iqtisodiy jinoyatlarga qarshi kurashish departamenti shahar boshqarmasi xodimlari hamkorligida o‘tkazilgan tezkor tadbir davomida aniqlandi.

Ma’lum bo‘lishicha, muqaddam sudlangan, advokatlar hay’ati a’zosi bo‘lgan shaxs firibgarlik yo‘li bilan 2 ming AQSH dollari miqdorida pul olayotgan vaqtida ashyoviy dalillar bilan qo‘lga olingan.

Tekshiruvlar jarayonida aniqlanishicha, u Shayxontohur tuman Ichki ishlar organlari faoliyatini muvofiqlashtirish boshqarmasi Tergov bo‘limi ish yurituvida bo‘lgan, Jinoyat kodeksining 168-moddasi asosida qo‘zg‘atilgan jinoyat ishi doirasida gumonlanuvchiga nisbatan «qamoq» ehtiyot chorasini qo‘llamaslik masalasini mansabdor tanishlari orqali hal qilib berishini va’da qilgan.

Ayni paytda holat yuzasidan tergov harakatlari olib borilmoqda. Voqeaning barcha holatlari va gumonlanuvchining harakatlariga huquqiy baho berish masalasi tegishli tartibda hal etiladi.