O‘zbekiston dunyoning eng tinch mamlakatlari ro‘yxatidan nechanchi o‘rinni egalladi?

Dunyoning turli mamlakatlarida xavfsizlik va barqarorlik holatini baholovchi Iqtisodiyot va tinchlik instituti tomonidan tayyorlangan Global Peace Index 2025 reytingi e’lon qilindi. Unga ko‘ra, 163 ta davlat orasida O‘zbekiston 67-o‘rinni egalladi.

Tadqiqot mualliflari qayd etishicha, dunyo miqyosida tinchlik darajasi pasayishda davom etmoqda. Joriy yilda global o‘rtacha tinchlik indeksi 0,36 foizga kamaygan bo‘lib, bu ketma-ket oltinchi yil davomida kuzatilayotgan salbiy tendensiya hisoblanadi. Ekspertlar bu holatni yirik mintaqaviy va xalqaro mojarolar xavfining oshib borishi bilan izohlamoqda.

Shu bilan birga, O‘zbekiston uchun reyting ijobiy yangiliklar bilan e’tiborli bo‘ldi. Mamlakat o‘tgan yilga nisbatan ikki pog‘ona yuqorilab, Moldova va Kipr davlatlari orasida joylashdi.

Markaziy Osiyo davlatlari kesimida Qozog‘iston 56-o‘rin bilan eng yaxshi natijani ko‘rsatgan. Undan keyin Qirg‘iziston (78-o‘rin), Tojikiston (79-o‘rin) va Turkmaniston (87-o‘rin) joy olgan.

Dunyodagi eng tinch 10 ta davlat ro‘yxatidan Islandiya, Irlandiya, Yangi Zelandiya, Avstriya, Shveytsariya, Singapur, Portugaliya, Daniya, Sloveniya va Finlyandiya o‘rin oldi.

Reytingning eng quyi qismida esa Rossiya joylashdi. Shuningdek, eng tinch bo‘lmagan davlatlar qatorida Ukraina, Sudan, Kongo Demokratik Respublikasi, Yaman, Afg‘oniston, Suriya, Janubiy Sudan, Isroil va Mali ham qayd etildi.

Ma’lumot uchun, Global Peace Index reytingi 23 ta ko‘rsatkich asosida tuziladi. Ular jamoat xavfsizligi darajasi, ichki va tashqi mojarolar holati hamda davlatlarning militarizatsiya darajasini qamrab oladi.