Tijorat oqimi 2,7 barobarga o‘sdi: qaysi davlatlar yetakchi?

2025 yilning yanvar–oktyabr oylarida tijorat maqsadida O‘zbekistonga kelgan chet el fuqarolari soni sezilarli darajada oshdi. Milliy statistika qo‘mitasi ma’lumotlariga ko‘ra, ushbu davrda mamlakatga jami 362,8 ming nafar xorijiy tijoratchi tashrif buyurgan.

Qayd etilishicha, tijorat maqsadida keluvchilar soni o‘tgan yilning shu davriga nisbatan 229,7 ming nafarga yoki 2,7 barobarga ko‘paygan. Bu ko‘rsatkich O‘zbekistonning mintaqada savdo va biznes uchun jozibadorligini yana bir bor namoyon etmoqda.

Statistikaga ko‘ra, joriy yilning 10 oyida O‘zbekistonga eng ko‘p tijoratchilar Afg‘onistondan kelgan. Ularning soni 339 585 nafarni tashkil etgan. Bu umumiy ko‘rsatkichning mutlaq ko‘p qismini tashkil qiladi.

Ikkinchi o‘rinda Tojikiston bo‘lib, ushbu davlatdan 16 734 nafar tijoratchi tashrif buyurgan. Keyingi o‘rinlarda Turkmaniston (2 773 nafar), Rossiya (673 nafar), Qozog‘iston (504 nafar) va Turkiya (492 nafar) qayd etilgan.

Shuningdek, boshqa davlatlardan jami 2 055 nafar xorijiy fuqaro tijorat maqsadida O‘zbekistonga kelgan.