«Million» nomi qayerdan chiqqan? Jamoa tarixi ochildi

«Million» jamoasi a’zosi Ahmad Temurov «IntervyuTV»ga bergan suhbatida jamoa qanday tashkil topgani va nom qanday tanlangani haqida qiziqarli xotiralar bilan o‘rtoqlashdi.

Uning aytishicha, «Million» jamoasining shakllanishi oddiy bir choyxonada boshlangan. Bir guruh do‘stlar yig‘ilib, yangi jamoa tuzish va unga munosib nom qo‘yish haqida o‘ylay boshlashgan. Har kim o‘z taklifini bildirgan, turli nomlar muhokama qilingan.

— Agar adashmasam, uchta variant bo‘lgan: «Bravo», «Million» va yana tarixiyroq bir nom. Uning aniq qanday bo‘lgani esda qolmagan, balki «Afrosiyob»ga o‘xshashroq nom bo‘lgan, — deydi Ahmad Temurov.

Suhbat davomida u «Million» nomini aynan Mirkomil aka taklif qilganini ta’kidladi. Ko‘pchilikka aynan shu nom ma’qul kelgan va jamoa shu nom bilan faoliyat boshlagan. Shu bilan birga, Davron akaga «Bravo» nomi yoqqani uchun kompaniyaga «Bravo Event Management» deb nom berilgan.

— Shundan keyin jamoa tuzilib, harakat boshlandi. Sahnada ijod qildik, Davron aka konsertlarni tashkil qildilar. Birinchi konsertimiz, ko‘z tegmasin, juda muvaffaqiyatli o‘tgan, — deya qo‘shimcha qildi u.

Boshlovchi konsertlar necha kun davom etgani haqida so‘raganda, Ahmad Temurov dastlab ikki kun bo‘lgan degan taxminni rad etib, ilk chiqishlar uch yoki to‘rt kun davom etganini ma’lum qildi.