O‘zbek talabalari deportatsiyadan qutqarildi: ombudsmanlar samarali harakat qildi
O‘zbekiston va Rossiya ombudsmanlarining hamkorlikdagi sa’y-harakatlari orqali Rossiyada tahsil olayotgan 31 nafar o‘zbek talabasi deportatsiya xavfidan asrab qolindi. Bu haqda “Dunyo” axborot agentligi rasman ma’lum qildi.
Ma’lum bo‘lishicha, yuzaga kelgan muammo talabalarning aybi bilan emas, balki Moskva shahridagi Oliy iqtisodiyot maktabining texnik va tashkiliy xatosi sabab paydo bo‘lgan. Ta’lim muassasasi talabalar uchun migratsiya hisobini uzaytirishga doir hujjatlarni belgilangan muddatda topshirmagan. Shu sababli, yoshlar 90 kundan ortiq vaqt davomida Rossiya hududida rasmiy ro‘yxatdan o‘tmagan holda qolib ketgan.
Bu holat esa qonunchilikka ko‘ra, har bir talaba uchun 40 ming rubl miqdorida jarima va mamlakatdan chiqarib yuborilish xavfini keltirib chiqargan. Vaziyat jiddiy tus olgan bir paytda talabalar O‘zbekistonning Moskvadagi elchixonasiga murojaat qilib, yordam so‘rashgan.
Masala zudlik bilan O‘zbekiston va Rossiya ombudsmanlari darajasida ko‘tarilib, Rossiya Ichki ishlar vazirligiga rasmiy murojaat qilingan. Natijada, talabalarga nisbatan jarima qo‘llamaslik va ularni deportatsiya qilmaslik bo‘yicha aniq ko‘rsatma berilgan.
Tekshiruv ishlari yakunlangach, barcha talabalarning Rossiyada qolish muddati uzaytirildi va ularning migratsiya maqomi to‘liq tiklandi. E’tiborli jihati shundaki, mazkur ish doirasida deportatsiya xavfi ostida qolgan boshqa MDH davlatlaridan kelgan 200 nafarga yaqin talabaning ham huquqlari himoya qilindi.
Ushbu voqea ombudsmanlar institutining amaliy ahamiyatini yana bir bor namoyon qildi. Eng muhimi, yoshlarning ta’lim olishi, kelajagi va huquqlari o‘z vaqtida himoya qilinib, adolat qaror topdi.
