"Qizilqum" Tojikiston terma jamoasi a’zosi bilan tarkibini kuchaytirdi

Yangi mavsum oldidan tarkibni yangilash ishlarini faol boshlagan Navoiyning Qizilqum jamoasi navbatdagi transferini rasman e’lon qildi. Klub o‘z safiga Tojikiston milliy terma jamoasi a’zosini qo‘shib oldi va bu qaror muxlislar orasida qiziqish uyg‘otdi.

23 yoshli yarim himoyachi Alisher Shukurov endi navoiyliklar sharafini himoya qiladi. Yosh bo‘lishiga qaramasdan, u allaqachon xalqaro tajriba to‘plashga ulgurgan futbolchilardan hisoblanadi. Shukurov faoliyati davomida Xo‘jand (Tojikiston), Tyumen (Rossiya) hamda Dinamo Tbilisi (Gruziya) klublarida to‘p tepib, turli chempionatlarda o‘zini sinab ko‘rgan.

Manbalarga ko‘ra, “Qizilqum” va Alisher Shukurov o‘rtasida tuzilgan shartnoma 1-yil muddatga mo‘ljallangan. Klub rahbariyati ushbu transfer orqali markaziy chiziqda raqobatni kuchaytirish va jamoaning o‘yin sifatini yaxshilashni maqsad qilgan.

Mutaxassislar fikricha, Shukurovning harakatchanligi, pas madaniyati va xalqaro tajribasi Navoiy jamoasiga yangi mavsumda qo‘shimcha kuch bag‘ishlashi mumkin. Muxlislar esa yangi legionerdan samarali o‘yin va muhim daqiqalarda foydali harakatlar kutishmoqda.