Rafinya: FIFA emas, «Barselona»ning natijasi men uchun muhim

Madriddagi «Vilyarreal»ga qarshi bahsdan keyin «Barselona» vingeri Rafinya FIFAning yil ramziy jamoasiga kiritilmagani borasida o‘z munosabatini bildirdi. Braziliyalik futbolchi bu masala unga umuman ta’sir qilmasligini ochiq aytdi.

Uning so‘zlariga ko‘ra, shaxsiy e’tiroflar va individual mukofotlar ikkinchi darajadagi masala. Asosiy maqsad esa — mavsum yakunida jamoa qanday natijalarga erishishi.

«Menga buning ahamiyati yo‘q. Rostini aytsam, umuman qiziq emas. Eng muhimi — mavsum oxirida «Barselona» nimalarni qo‘lga kiritadi», — dedi Rafinya.

Kataloniya klubi safida 2022-yil yozidan buyon to‘p tepib kelayotgan vinger jamoaning hujumdagi muhim bo‘g‘inlaridan biri hisoblanadi. Uning «Barselona» bilan amaldagi shartnomasi 2028-yil iyun oyi oxirigacha mo‘ljallangan bo‘lib, klub unga uzoq muddatli ishonch bildirgan.

Avvalroq jamoa bosh murabbiyi Xansi Flik ham Rafinyaning FIFA yil jamoasidan joy olmaganini adolatsiz qaror sifatida baholagan edi. Shunga qaramay, futbolchining o‘zi tashqi baholardan ko‘ra, jamoaviy maqsadlarni ustun qo‘yayotganini yana bir bor tasdiqladi.

Rafinya uchun hozir eng muhimi — maydonda o‘z so‘zini aytish va «Barselona»ni sovrinlar sari yetaklash. Qolgan bahslar esa, uning nazaricha, ortiqcha shov-shuvdan boshqa narsa emas.