Vinisius atrofidagi hushtakbozlik: “Bernabeu”dagi sovuq ishoralar...

Ispaniya chempionatining 17-turida "Real" o‘z maydonida "Sevilya"ni qabul qilib, ishonchli 2:0 hisobida g‘alaba qozondi. Uchrashuv taqdirini Jud Bellingem va Kilian Mbappening aniq zarbalari hal qildi.

Biroq bahsdan keyingi asosiy muhokama g‘alaba emas, balki Vinisius Junior bilan bog‘liq vaziyat bo‘ldi. Uchrashuvni asosiy tarkibda boshlagan braziliyalik vinger yana gol ura olmadi va 83-daqiqada almashtirildi. Shu paytda “Santyago Bernabeu” tribunalaridan hushtak ovozlari yangradi — muxlislar Vinisiusning o‘yinidan norozi ekanini ochiq namoyon qildi.

Futbolchining o‘zi esa bu qarorni og‘ir qabul qilgani yaqqol sezildi. Uchrashuvdan keyin Vinisius ijtimoiy tarmoqlardagi sahifasida bir qator ramziy harakatlar qildi: u “Real” libosidagi suratini o‘chirib, profiliga Braziliya milliy jamoasi formasidagi rasmini joyladi. Shuningdek, “Real” o‘yinidan olingan kadrni alohida post qilib, uni uch nuqta bilan qoldirdi. Bu ishora muxlislar orasida turli taxminlarga sabab bo‘ldi.

Ayni paytda statistika ham Vinisius uchun yorqin emas. U oktyabr oyining birinchi yarmidan buyon raqib darvozasini ishg‘ol qila olmayapti. Joriy mavsumda u barcha musobaqalarda 23 ta o‘yin o‘tkazib, 5 ta gol va 8 ta golli uzatma muallifi bo‘lgan, ammo yetakchi yulduzdan kutilgan daraja hali ko‘rinmayapti.

Uchrashuvdan so‘ng Xabi Alonso muxlislarning hushtakbozligiga munosabat bildirib, buni tabiiy holat sifatida baholadi. Uning so‘zlariga ko‘ra, muxlislar fikr bildirishga haqli, futbolchi esa bunday bosimga tayyor bo‘lishi kerak.

Qisqasi, “Real” g‘alaba qozondi, ammo Vinisius atrofidagi ruhiy fon yanada qizidi. Endi muxlislarni ham, murabbiylarni ham bir savol o‘ylantiradi: braziliyalik yulduz bu bosimdan kuchliroq bo‘lib chiqadimi yoki tanqidlar yanada ortib boradimi?