Mayk Tayson Konor Makgregorni noyob energiya sohibi deb baholadi

Boks olamining tirik afsonasi Mayk Tayson UFC’ning sobiq chempioni Konor Makgregor bilan uchrashuvdan keyin irlandiyalik jangchi haqida juda iliq va yuqori baho berdi. Taysonning so‘zlariga ko‘ra, Makgregor — oddiy sportchi emas, balki kamdan kam uchraydigan xarizma va kuchli ruhiy energiyaga ega shaxs.

«Konor — aql bovar qilmas darajadagi inson. Unda qandaydir boshqacha joziba bor. Rostini aytsam, Makgregorga o‘xshagan odamni juda kam uchratganman. Uning energiyasi atrofdagilarga ham o‘tib ketadi», — deya Taysonning fikrlarini Bloody Elbow nashri keltirdi.

Ma’lumki, Konor Makgregor nafaqat oktagondagi yutuqlari, balki o‘zining o‘ziga xos xarakteri, chiqishlari va ishonchli bayonotlari bilan ham muxlislar e’tiborini tortib keladi. Uning MMAdagi professional faoliyati davomida 22 ta g‘alaba va 6 ta mag‘lubiyat qayd etilgan bo‘lib, bu natijalar uni zamonaviy jang sportlarining eng mashhur yulduzlaridan biriga aylantirgan.

Taysonning bunday fikr bildirishi esa Makgregorning nafaqat oktagonda, balki sport olamidagi nufuzi yanada yuqori ekanini ko‘rsatib turibdi.