Shomurodovning raqobatchisi A Seriyaga qaytmoqchi: «Milan» varianti muhokamada

Turkiya Superligasida to‘purarlar poygasida Eldor Shomurodov bilan yelkama-yelka kurash olib borayotgan mashhur hujumchi Mauro Ikardi faoliyatida yangi burilish bo‘lishi mumkin. Argentinalik futbolchi yana Italiya A Seriyasiga qaytish imkoniyatiga ega bo‘ldi.

Bir necha mavsumdan beri “Galatasaroy” safida o‘ynab kelayotgan Ikardi yozgi transferlar oynasida “Milan”ga ko‘chib o‘tishi ehtimoli yuqori baholanmoqda. Bu haqda ishonchli insayder Matteo Moretto ijtimoiy tarmoqlarda ma’lum qildi.

Xabarlarga ko‘ra, 32 yoshli hujumchi “Milan” rahbariyati tomonidan hujum chizig‘ini kuchaytirish maqsadida taklif etilgan. Ayniqsa, jamoani tark etishi kutilayotgan Santyago Ximenesga munosib o‘rinbosar sifatida Ikardi nomzodi ko‘rib chiqilmoqda. Ta’kidlanishicha, “rossonerilar” tajribali va hal qiluvchi pallalarda o‘z so‘zini ayta oladigan futbolchiga ehtiyoj sezmoqda.

Mauro Ikardining o‘zi ham Istanbul klubini tark etish variantini istisno qilmayapti. So‘nggi oylarda u asosiy tarkibga kirishda qiyinchiliklarga duch kelmoqda, raqobat esa tobora kuchayib bormoqda. Bu holat futbolchini kelajagi haqida jiddiy o‘ylashga majbur qilmoqda.

Ma’lumot uchun, Ikardi 2023 yil iyul oyida PSJdan “Galatasaroy”ga 10 million yevro evaziga ko‘chib o‘tgan edi. Joriy mavsumda u klub miqyosida 21 ta uchrashuvda ishtirok etib, 8 ta gol urishga muvaffaq bo‘ldi.

Agar ushbu transfer amalga oshsa, Ikardi uchun bu A Seriyaga navbatdagi qaytish bo‘ladi. “Milan” esa uning tajribasi va gol urish qobiliyati orqali chempionlik poygasida o‘z pozitsiyasini yanada mustahkamlashni rejalashtirmoqda.