Shomurodov finaldan keyin jamoa tempi oshganini tan oldi

O‘zbekiston milliy terma jamoasi FIFA kunlarida Misr va Eronga qarshi o‘tkazilgan o‘rtoqlik turnirida maydonga tushib, muxlislar kutganidek, finalda forslar ustidan ishonchli g‘alabaga erishdi. Bellashuvdan so‘ng jamoa hujumchisi Eldor Shomurodov o‘yin haqida o‘z fikrlarini baham ko‘rdi va jamoadagi o‘zgarishlar haqida ochiqcha gapirdi.

Forvardning aytishicha, jamoa avvalgi o‘yinlarga nisbatan bir bosqich yuqori saviyada harakat qilgan.

“Bu safar o‘tgan uchrashuvlardan ko‘ra yaxshiroq tasavvur qoldira oldik. Birinchi bo‘limda bir qancha aniq imkoniyatlar yaratdik. Ikkinchi taymda esa bitta kishi kam bo‘lsak ham, jipslik bilan himoyalanib, raqibni jiddiy vaziyatlarga kiritmadik”, — deydi Shomurodov.

Shuningdek, undan penalti masalasi haqida ham so‘rashdi. Qirg‘izistonga qarshi o‘yindagi noaniq zarbasidan keyin Turkiyada u ishonchli harakat qilgandi, bugungi finalda ham shunday bo‘ldi.

“O‘sha o‘yindan keyin penalti bo‘yicha ko‘proq ishlashga to‘g‘ri keldi. Texnikamni, tepish uslubimni to‘liq yangiladim, shu bois oxirgi paytlarda o‘zimni ancha ishonchli his qilayapman”, — dedi Eldor.

Eng qiziq savollardan biri — Kannavaro ta’siri haqida bo‘ldi. Terma jamoa ikki marta yig‘in o‘tkazdi va bu davrda jamoada taktik va xarakter nuqtayi nazardan o‘zgarish sezilmoqda.

“Albatta, o‘zgarishlar juda aniq ko‘rinib turibdi. Kannavaro bizdan doim oldinga harakat qilishni, agressiv o‘yinni, yuqori tempni talab qilyapti. Ham taktikada, ham o‘z uslubimizda yangiliklar ko‘p. Jamoa o‘yini bosqichma-bosqich rivojlanib borayapti”, — deya ta’kidladi hujumchi.

Finaldagi g‘alaba terma jamoa uchun muhim psixologik impuls bo‘ldi. Ayniqsa, jamoa 10 kishi bo‘lgan vaziyatda ham barqaror o‘yin ko‘rsatgani safdagi futbolchilarning mentaliteti o‘sib borayotganini ko‘rsatdi.

Endilikda terma jamoa navbatdagi yig‘inlarga va rasmiy uchrashuvlarga tayyorgarlikni davom ettiradi. Muxlislar esa Kannavaro boshqaruvidagi yangi O‘zbekistondan yanada dinamik, tezkor va hujumkor o‘yin kutishmoqda.