Ertaga mamlakat bo‘ylab sovuq va nam havo bo‘lishi kutilmoqda

O‘zgidromet 16 dekabr kuniga mo‘ljallangan yangilangan, batafsil ob-havo prognozini e’lon qildi. Kutilganidek, mamlakatning ko‘plab hududlarida havo o‘zgaruvchan bo‘lib, ayrim joylarda yomg‘ir, ba’zilarida esa qor kuzatilishi ehtimol qilinmoqda. Tuman ham deyarli barcha viloyatlarda qayd etilishi mumkin.

Toshkent shahrida o‘zgaruvchan ob-havo hukm suradi. Kechqurun biroz yomg‘ir yog‘ishi mumkin. Shamol g‘arb tomondan 3–8 m/s tezlikda esadi. Harorat kechasi 1° sovuq – 1° iliq oralig‘ida, kunduzi esa 7–9° iliq atrofida bo‘ladi. Ertalab tuman tushishi ehtimoldan xoli emas.

Qoraqalpog‘istonda ayrim joylarda qor yog‘ishi kutilmoqda. Tuman tushishi ehtimoli yuqori. Shamol g‘arbdan 7–12 m/s, harorat kechasi 3–8° sovuq, kunduzi 0–5° iliq bo‘ladi.

Xorazm viloyatida yog‘ingarchilik prognoz qilinmagan, ammo tuman xavfi saqlanib qolmoqda. Shamol g‘arbdan 7–12 m/s. Harorat kechasi 3–8° sovuq, kunduzi 0–5° iliq bo‘lishi kutilmoqda.

Buxoro viloyatida ham o‘xshash holat — yog‘ingarchilik kutilmaydi, lekin tuman tushishi mumkin. Kechasi 2° sovuq – 3° iliq, kunduzi 5–10° iliq bo‘ladi.

Navoiy viloyatida kechga tomon ayrim hududlarda yomg‘ir tomchilashi mumkin. Kechasi 2° sovuq – 3° iliq, kunduzi 5–10° iliq bo‘ladi.

Toshkent, Sirdaryo, Samarqand va Jizzax viloyatlarida kechga borib yomg‘ir yog‘ishi ehtimoli bor. Kechasi 2° sovuq – 3° iliq, kunduzi 5–10° iliq.

Qashqadaryo va Surxondaryoda yomg‘ir kuzatilishi mumkin. Harorat kechasi 0–5° iliq, kunduzi 8–13° iliq bo‘ladi.

Andijon, Namangan va Farg‘ona viloyatlarida yog‘ingarchilik kutilmaydi, lekin tuman tushishi mumkin. Harorat kechasi 0–5° iliq, kunduzi 5–10° iliq.

Tog‘li hududlarda ayrim paytlarda qor yog‘ishi ehtimol qilinmoqda. Toshkent va Namanganning tog‘li tumanlarida qor ko‘chishi xavfi saqlanib turibdi. Harorat kechasi 3° sovuq – 2° iliq, kunduzi 0–5° iliq.

Ob-havo sharoiti, ayniqsa tuman va yog‘ingarchilik kuchayishi mumkin bo‘lgan joylarda, yo‘llarda ehtiyotkorlikni talab etadi.