«Dunyoga tinchlik sovg‘asi»: Lukashenko AQSH strategiyasi haqida

Belarus rahbari Aleksandr Lukashenko AQSH tomonidan yaqinda qabul qilingan milliy xavfsizlik strategiyasiga o‘z munosabatini bildirdi. Uning ta’kidlashicha, mazkur hujjat amalda to‘liq bajarilsa, bu nafaqat alohida davlatlar, balki butun insoniyat uchun ijobiy natija olib kelishi mumkin.

Lukashenkoning so‘zlariga ko‘ra, ushbu strategiyada nazarda tutilgan yondashuvlar hayotga tatbiq etilsa, global tinchlik va barqarorlikni mustahkamlashga xizmat qiladi. Shu bois u buni jahon hamjamiyati uchun muhim qadam, deb hisoblaydi.

«Agar aytilgan rejalar amalga oshsa, bu dunyo uchun katta sovg‘a bo‘ladi», — dedi Belarus rahbari Newsmax telekanaliga bergan intervyusida.