Kannavaro Italiya futbolining muammolari va yechimlari haqida...

O‘zbekiston milliy terma jamoasi bosh murabbiyi Fabio Kannavaro Italiya futbolidagi bugungi holatni tahlil qilib, mavjud muammolar va ularning milliy jamoaga ta’siri haqida fikr bildirdi. Uning ta’kidlashicha, so‘nggi yillarda Italiya chempionatida mahalliy futbolchilar, ayniqsa, yosh iste’dodlarga kamroq ishonch bildirilmoqda.

Kannavaroning aytishicha, bu tendensiya Italiya milliy terma jamoasining raqobatbardoshligiga salbiy ta’sir ko‘rsatyapti. U 2006 yilgi Jahon chempionati oldidan Seriya A maydonlarida italiyalik futbolchilar o‘rtasida juda kuchli raqobat bo‘lganini esladi. Ana shu ichki raqobat terma jamoaning muvaffaqiyati uchun mustahkam poydevor bo‘lib xizmat qilgan.

Mutaxassis hozirgi tayyorgarlik tizimiga ham tanqidiy yondashdi. Uning fikricha, bugun yosh futbolchilarga avvalo taktik intizom o‘rgatishga urg‘u berilmoqda, holbuki, futbolchining asosiy quroli — texnika bo‘lishi kerak. Kannavaro yosh futbolchini qurilayotgan uyga qiyoslab, uning poydevori taktika emas, aynan texnik mahorat ekanini alohida ta’kidladi.

Shuningdek, u Jan Pero Gasperini qo‘llayotgan uslublarni namuna sifatida keltirib, ana shunday yondashuvlar orqali yosh futbolchilarni jismoniy va texnik jihatdan ancha samarali rivojlantirish mumkinligini bildirdi.

Kannavaroning bu fikrlari nafaqat Italiya futboli, balki umumiy futbol tizimi uchun ham muhim signal sifatida baholanmoqda. Ushbu mulohazalar yosh avlodni tarbiyalashda ustuvor yo‘nalishlarni qayta ko‘rib chiqish zarurligini yana bir bor eslatadi.