Dubayda yosh para sportchilar 197 ta medalni qo‘lga kiritib, tarix yaratishdi

Birlashgan Arab Amirliklarining Dubay shahrida bo‘lib o‘tgan V yoshlar Para Osiyo o‘yinlarida mislsiz natija qayd etgan O‘zbekiston sport delegatsiyasi Vatanga tantanali ruhda qaytdi. Qahramon sportchilarimiz Toshkent xalqaro aeroportida davlat va jamoatchilik vakillari, muxlislar hamda yaqinlari tomonidan katta hurmat bilan kutib olindi.

Ushbu nufuzli musobaqada O‘zbekiston yosh para sportchilari jami 197 ta medalni qo‘lga kiritdi. Shundan 99 tasi oltin, 57 tasi kumush va 41 tasi bronza medal bo‘lib, bu ko‘rsatkich delegatsiyamizga umumjamoa hisobida mutlaq birinchi o‘rinni ta’minladi. Bu natija nafaqat joriy musobaqa, balki O‘zbekiston para sporti tarixi uchun ham yangi bosqich bo‘ldi.

Ayniqsa, para pauerlifting bo‘yicha vakilimiz Bahriddin Xolbo‘tayevning chiqishi alohida e’tiborga loyiq. U 54 kg vazn toifasida 121 kilogramm og‘irlikni ko‘tarib, nafaqat oltin medalga sazovor bo‘ldi, balki yangi Osiyo rekordini ham o‘rnatdi. Bu yutuq uning shaxsiy mehnati bilan birga, mamlakatimizda para sportga yaratilayotgan sharoitlar samarasini yaqqol ko‘rsatdi.

7–14-dekabr kunlari bo‘lib o‘tgan Para Osiyo o‘yinlarida qit’amizning 35 mamlakatidan qariyb 1500 nafar yosh atlet 11 ta sport turi bo‘yicha kuch sinashdi. O‘zbekiston delegatsiyasi esa para yengil atletika, para taekvondo, bochcha, para suzish, para armrestling va para pauerlifting kabi yo‘nalishlarda munosib ishtirok etdi.

Qayd etish joiz, bunday yuksak natija tasodif emas. Solishtirish uchun, 2021-yil Bahraynda o‘tkazilgan IV Para Osiyo o‘yinlarida yurtdoshlarimiz jami 16 ta medal bilan umumjamoa hisobida 6-o‘rinni egallagan edi. Oradan o‘tgan qisqa vaqt ichida esa O‘zbekiston yosh para sportchilari ulkan sakrashga erishdi.

Bu g‘alabalar — iroda, mehnat va ishonch mevasi. Eng muhimi, bu natijalar kelajakda yanada katta zafarlar uchun mustahkam poydevor bo‘lib xizmat qiladi.