Shomurodov va Fayzullayev kechagi uchrashuvda necha baho olishdi? (video)

Turkiya Superligasining 16-turi doirasida «Samsunspor» hamda «Istanbul Bashakshehir» jamoalari o‘rtasida o‘tgan bahs mehmonlarning 2:0 hisobidagi ishonchli g‘alabasi bilan yakunlandi. Uchrashuvda O‘zbekiston milliy terma jamoasi hujumchisi Eldor Shomurodov asosiy qahramonga aylandi.

Bellashuvning 66-daqiqasida Shomurodov raqib himoyachilarining qo‘pol xatosidan mahorat bilan foydalanib, hisobni ochdi. Bu gol o‘yin taqdirini katta ehtimol bilan hal qildi. 83-daqiqada esa u jamoadoshining goliga aniq uzatma amalga oshirib, o‘z hisobiga assist ham yozdirib qo‘ydi. 87-daqiqada hujumchi muxlislar qarsaklari ostida zaxiraga olindi.

Abbosbek Fayzullayev ushbu bahsda 67 daqiqa maydonda harakat qildi. U faolligi bilan ajralib turgan bo‘lsa-da, hal qiluvchi harakatlar bilan ajralib chiqishga uncha muvaffaq bo‘la olmadi.

Uchrashuvdan so‘ng Sofascore statistik portali Eldor Shomurodovning o‘yinini 8,1 ball bilan baholadi. Bu bahsdagi eng yuqori ko‘rsatkichlardan biri bo‘ldi. Abbosbek Fayzullayev esa 6,7 ballga loyiq ko‘rildi. Quyidagi rasmda keltirilgan joylashuv va individual baholar ham Shomurodovning maydondagi ustunligini yaqqol ko‘rsatib turibdi.

Shu tariqa, «Istanbul Bashakshehir» ushbu g‘alaba orqali turnir jadvalidagi pozitsiyasini mustahkamlab oldi, Eldor Shomurodov esa nafaqat jamoasi, balki butun o‘zbek futboli muxlislari uchun yana bir bor faxr manbaiga aylandi.