«Traktor» bosh murabbiyi: «Nasaf»ning o‘yin uslubi muhim, faqat natija emas»

Elita OCHLning 5-tur bahsi doirasida Qarshining «Nasaf» klubiga qarshi maydonga tushadigan Eronning «Traktor» jamoasi bosh murabbiyi Dragan Skochich o‘yindan avvalgi matbuot anjumanida ishtirok etdi. Xorvatiyalik mutaxassis raqibga nisbatan yuksak ehtiromini bildirib, muhim taktik tahlillarni oshkor qildi.

Raqibga hurmat va yo‘qotishlar

Skochich so‘z boshidayoq «Nasaf» haqida to‘liq ma’lumotga ega ekanligini va ularni jiddiy qabul qilishini ma’lum qildi.

«Biz raqib haqida aniq ma’lumotga egamiz. «Nasaf»ning so‘nggi o‘yinlarda kutilgan natijaga erishmayotgani, bizning ularga bo‘lgan ehtiromimizni aslo pasaytirmaydi. Oldinda juda murakkab va hal qiluvchi bahs kutmoqda, biz unga tayyormiz».

Murabbiy tarkibdagi yo‘qotish haqida ham gapirib o‘tdi: «Afsuski, xorvatiyalik legionerimiz Igor Postoniyskiga umid bog‘lay olmaymiz, ammo qolgan barcha futbolchilar safda. Yaxshi o‘yin ko‘rsatib, munosib natijaga erishishga intilamiz».

«Nasaf»ning muvaffaqiyatsizligi sabablari

«Nasaf»ning so‘nggi haftalardagi omadsiz seriyasi va ertangi o‘yin ular uchun so‘nggi imkoniyatlardan biri ekani haqidagi savolga javob berar ekan, Skochich taktik yondashuv muhimligini ta’kidladi.

«Ha, ularning natijalari muvaffaqiyatsiz bo‘ldi, ammo biz faqat raqamlarga e’tibor bermaymiz. Bu vaziyatda «Nasaf»ning o‘yin uslubi muhimroq. Ular «Al Vahda»ga qarshi o‘yinda oddiy xatoliklar tufayli mag‘lubiyatga uchradi. Ertangi o‘yinning turli sharoitlariga moslashishimiz lozim.

Murabbiy raqibning kuchli jihatlarini sanab o‘tdi: «Bu jamoa uzun paslar, tezkor to‘p almashinuvlari, himoya chizig‘i ortidagi bo‘shliqlardan foydalanish kabi xilma-xil taktikadan foydalana oladi. Bu yaxshi tashkil etilgan jamoa, shunchaki dastlabki o‘yinlarda biroz omad ulardan yuz o‘girgan».

Iqtidorlilar va Katanetsga salom

Skochich «Nasaf»ning qaysi futbolchilari unda iliq taassurot qoldirgani haqidagi savolga o‘yin oldidan individual tavsif bermasligini ma’lum qildi.

«Biz yaxshi jamoaga qarshi o‘ynayapmiz. Ularda yorqin va iste’dodli o‘yinchilar ko‘p, lekin buguncha tafsilotlarga to‘xtalmayman».

Nutq yakunida Skochich kutilmaganda o‘zbek futboli muxlislariga tanish inson — O‘zbekiston milliy terma jamoasining sobiq bosh murabbiyi Srechko Katanetsga salom yo‘lladi: «Fursatdan foydalanib, qadrdon do‘stim Srechko Katanetsga sog‘lik tilashni istayman».