Shomurodovning Turkiyadagi porlashi «Roma»ni o‘ylantirmoqda

Eldor Shomurodovning Turkiyaga ko‘chib o‘tganidan keyin qayta tiklangan o‘yinlari nafaqat mahalliy muxlislarni, balki Yevropadagi insayderlar va klublar nazarini ham o‘ziga qaratmoqda. O‘zbekiston milliy terma jamoasi sardori Italiyani tark etib, «Istanbul Bashakshehir» safida maydonga tusha boshlagach, yana o‘sha ishonchli, qaynoq formasiga qaytib, to‘purarlik mahoratini kuchli tarzda namoyon qilmoqda.

Shomurodovning Turkiyadagi tiklanishi — «Bashakshehir» uchun to‘g‘ri qaror

Yozda «Roma» o‘zbek forvardini keyinchalik sotib olish imkoniyati bilan «Bashakshehir»ga ijaraga bergandi. Turklar uchun bu qaror ayni muddao bo‘ldi — Eldor birin-ketin uchrashuvlarda jamoa uchun hal qiluvchi go‘yoki «qutqaruvchi»ga aylandi. Mavsum davomida u harakatchan o‘yinlari bilan klubni tezda o‘z atrofiga aylantirib oldi.

Endi esa «Bashakshehir» rahbariyati Shomurodovni to‘liq transfer qilish masalasini kun tartibiga qo‘ydi. Turk matbuoti va insayderlar bu jarayon yanvardayoq amalga oshishi mumkinligini ta’kidlamoqda.

Italiya matbuoti ham so‘zga kirdi — «Roma» afsusda?

Italiyaning nufuzli manbalari, jumladan romaforever.it, o‘zbek hujumchisining Turkiyadagi tashabbuskor o‘yinidan keyin rimliklarda xavotir paydo bo‘lganini qayd etmoqda.

«Roma» muxlislarining ko‘pchiligi esa hozirda jamoa hujum chizig‘ida samaradorlik yetishmayotgani sabab Eldorning ketganidan afsusda. Artyom Dovbik yoki Evan Fergyuson kabi hujumchilar kutilgan darajada o‘yin namoyon qilmayotgani orqali, «Shomurodovni olib qolish kerak edi», degan fikrlar keng muhokama qilinmoqda.

Diqqatga molik jihati — Eldor o‘tgan mavsum «Roma»da 37 o‘yinda ishtirok etib, 7 gol va 5 assist qayd etgandi. Ammo Turkiyadagi ko‘tarinki ruh, ishonch va asosiy tarkibdagi barqaror o‘rin unga yana bir bor porlash imkonini berdi.

Transfer shartlari qanday? Yanvarda hal bo‘ladimi?

Taniqli insayder Filippo Biafora ma’lumotlariga ko‘ra, «Bashakshehir» Eldorni qishki transfer oyida 2,8 million yevro evaziga sotib olish imkoniga ega. Agar bu qaror yanvarda amalga oshmasa, jamoa mavsumni Superligada ushlab qolsa, transfer avtomatik tarzda amalga oshiriladi.

«Roma» esa moliyaviy jihatdan bu bitimni juda manfaatli deb hisoblayapti. Yozdagi ijara uchun 3 million yevro olgan rimliklar to‘liq transferdan yana 2,8 million yevro ishlab oladi. Shu bois rimliklarning asosiy savoli — bu jarayon qachon amalga oshadi?

Shomurodovning statistikasi — o‘z-o‘ziga javob

Eng muhim omil — Eldorning o‘zi. Chunki 12 ta o‘yinda 8 ta gol urgan, to‘purarlar poygasida peshqadamlar orasida turgan hujumchini qaysi klub shunchaki qo‘ldan chiqarsin?

Romaforever.it jurnalisti Luka Mugnayoli ham shunday deb yozadi:

«Shomurodovga bo‘lgan ishonch, samaradorlik va o‘yindagi barqarorlik «Bashakshehir»ni transferni yanvardayoq yakunlashga majbur qilishi mumkin».

Eldorning Turkiyadagi porlashi unga yanada keng imkoniyatlar eshigini ochmoqda. Uning o‘yini nafaqat klub, balki milliy terma jamoa uchun ham katta kuch. Xulosa bitta: Eldor yana bir bor o‘zini katta sahnada qaytardi va hozircha to‘xtash niyatida emas.