19 dekabr kuni Tayvanda jamoat xavfsizligi bilan bog‘liq juda og‘ir va kamyob fojea sodir bo‘ldi. Mahalliy vaqt bilan soat 17:20 atrofida 27 yoshli erkak avvaliga metropolitenning eng gavjum bekatlaridan biriga tutunli granatalar va “Molotov kokteyllari”ni uloqtirgan. Bu holat bekatdagi yo‘lovchilar orasida sarosima va qo‘rquvni kuchaytirgan.
Shundan so‘ng u metro yo‘nalishi bo‘ylab taxminan 800 metr masofada joylashgan boshqa bir bekat tomon yugurgan. Yo‘l-yo‘lakay u uchragan bir necha kishini pichoqlab ketgani ma’lum qilinmoqda. Ikkinchi bekatga yetib borgach ham hujum to‘xtamagan: u yerda ham granatalar tashlangan va odamlarga pichoq bilan hujum qilingan.
Hujumdan keyin gumondor yaqin atrofdagi binolardan birining tomidan pastga sakrab tushgan. U og‘ir ahvolda shifoxonaga olib borilgan, ammo shifokorlar uning hayotini saqlab qola olmagan. Shu tariqa, ushbu fojea oqibatida halok bo‘lganlar soni to‘rt nafarga yetgan.
Qurbonlar orasida qotilni to‘xtatishga urinib, jasorat ko‘rsatgan erkak ham borligi aytilmoqda. U avval yaralangan holda kasalxonaga yetkazilgan, ammo keyinchalik u yerda vafot etgan.
Rasmiy ma’lumotlarga ko‘ra, gumondor Chang Ven ismli Tayvan fuqarosi bo‘lgan. Mamlakat bosh vaziri Cho Jung bu hujumni “qasddan amalga oshirilgan harakat” deya baholadi. Tergovning dastlabki versiyasiga ko‘ra, u barcha harakatlarni yolg‘iz o‘zi bajargan.
Fojeadan so‘ng butun mamlakat bo‘ylab temiryo‘l va metro bekatlarida xavfsizlik choralari keskin kuchaytirildi. Qo‘shimcha patrullar joylashtirildi, tekshiruvlar soni oshirildi.
Qayd etish joiz, Tayvanda zo‘ravonlik bilan bog‘liq jinoyatlar darajasi ancha past hisoblanadi va bunday holatlar juda kam uchraydi. Shunga o‘xshash so‘nggi yirik voqea 2014 yilda sodir bo‘lgan bo‘lib, o‘shanda Taypey metrosida to‘rt nafar inson halok bo‘lgan, aybdor esa ikki yil o‘tib qatl etilgan edi.
Shu sababli bugungi hujum Tayvan jamiyati uchun kutilmagan va og‘ir zarba sifatida qabul qilinmoqda.
Tayvan fojeasi, Jamoat xavfsizligi, Chang Ven, Cho Jung, Metro hujumi
