Amazon OpenAI’ga ulkan sarmoya kiritishni rejalashtirmoqda

Amazon korporatsiyasi ChatGPT chatbotini ishlab chiqayotgan OpenAI kompaniyasiga 10 milliard dollar miqdorida investitsiya kiritish imkoniyatini ko‘rib chiqmoqda. Bu haqda Reuters manbalariga tayanib xabar berdi. Ayni paytda tomonlar o‘rtasidagi muzokaralar boshlang‘ich bosqichda bo‘lib, kelishuvning aniq shartlari hali rasman tasdiqlanmagan.

Ma’lumotlarga ko‘ra, OpenAI o‘z qiymatini 1 trillion dollargacha baholab, IPO — aksiyalarni ommaviy joylashtirishga tayyorgarlik ko‘rayotganini bildirgan. Agar bitim amalga oshsa, OpenAI Amazon’ning Trainium nomli maxsus sun’iy intellekt chiplarini xarid qilib, neyron tarmoqlarni o‘qitish jarayonida qo‘llashi mumkin.

Ayni vaqtda ushbu chiplar Databricks, Ricoh va NinjaTech AI kabi yirik texnologik kompaniyalar tomonidan faol ishlatilayotgani qayd etilmoqda. Bu esa Amazon’ning sun’iy intellekt infratuzilmasini bozorda faol ilgari surayotganidan dalolat beradi.

Shu bilan birga, OpenAI ChatGPT’ning korporativ versiyasini Amazon’ga taklif qilish masalasini ham o‘rganmoqda. Biroq hozircha chatbotni Amazon’ning marketpleysi yoki xizmatlar tizimiga to‘liq integratsiya qilish bo‘yicha aniq qaror qabul qilinmagan.

Eslatib o‘tamiz, avvalroq Microsoft OpenAI’da 27 foiz ulushni sotib olgan va chatbot modellarini o‘zining bulutli platformalari orqali mijozlarga eksklyuziv taqdim etish huquqini qo‘lga kiritgan edi. Bu esa sun’iy intellekt bozoridagi raqobat yanada keskinlashayotganini ko‘rsatmoqda.

Ekspertlar fikricha, agar Amazon ham OpenAI’ga yirik sarmoya kiritsa, global AI bozorida kuchlar nisbati yangi bosqichga chiqishi mumkin.