Polina Kuderetovaning sport fuqaroligini o‘zgartirishi bo‘yicha yangi tafsilotlar ma’lum bo‘ldi. Rossiyalik taniqli tennischi Yevgeniy Kafelnikovning Sport24 nashriga bergan intervyusida aytishicha, Polinaning O‘zbekiston fuqarosi bo‘lgan yigiti uni ushbu qarorga undagan.
"Men shaxsan bilaman, Polinaning yigiti O‘zbekiston fuqarosi. Aynan u uni bu qarorga yetakladi. Bu odatiy hol", — dedi Kafelnikov. Kafelnikov qo‘shimcha qilishicha, Polinaning Rossiya tennisini tark etishini katta yo‘qotish deb hisoblamaydi.
O‘zbekiston Tennis Federatsiyasi yaqinda ushbu masalaga rasman nuqta qo‘ydi — Polina Kuderetova O‘zbekiston milliy terma jamoasiga rasmiy a’zo bo‘ldi. Bunga qadar ITF rasmiy saytida Polinaning profilida O‘zbekiston bayrog‘i paydo bo‘lgan edi.
2023 yil Polina uchun muvaffaqiyatli yil bo‘ldi. Yil boshida u Brisben turnirida finalga chiqdi va ilk bor dunyo reytingining top-100 taligiga kirdi.
Bahorda u 54-o‘ringacha ko‘tarildi, hozirda esa 104-o‘rinda turibdi. 2024 yildan boshlab Polinani O‘zbekistondagi murabbiy Ravshan Sultonov tayyorlaydi.
Polinaning katta singlisi Veronika Kuderetova — Uimbldon chempioni va taniqli tennischi. O‘zbekiston terma jamoasida 22 yoshli Polina Kuderetova Kamila Rahimova va Mariya Timofeeva bilan birga raqobat olib boradi.
Rossiya Tennis Federatsiyasi rahbari va Xalqaro Olimpiya Qo‘mitasi a’zosi Shamil Tarpishev ushbu tendensiyani izohlab, bu o‘zgarishlar terma jamoaning yetakchi o‘yinchilariga taalluqli emasligini ta’kidladi.
Polina Kuderetova, O‘zbekiston fuqarosi, Tennis federatsiyasi, Milliy terma jamoa, Ravshan Sultonov
