Kompani 17 yoshli Karlning jasoratini maxsus ta’kidladi

Chempionlar ligasi umumiy bosqichi 6-turida “Bavariya” o‘z uyida “Sporting”ni 3:1 hisobida mag‘lub etib, muhim g‘alabaga erishdi. Uchrashuvdan so‘ng myunxenliklar bosh murabbiyi Vensan Kompani jamoa o‘yini, raqibning salohiyati va eng muhimi — 17 yoshli iste’dod Lennart Karlning maydondagi harakatlariga alohida to‘xtalib o‘tdi.

Kompanining ta’kidlashicha, “Sporting” yuzasidan vaziyat kutilganidan ham murakkabroq bo‘lgan:

— “Sporting” juda jiddiy raqib. Ular Chempionlar ligasida top-8 jamoalar qatoriga bejiz kira olmagan. Birinchi bo‘lib gol o‘tkazib qo‘ygan bo‘lsak ham, biz shoshilmadik, o‘yinni o‘z qo‘limizda ushlab turdik va vaziyatni o‘z foydamizga burdik, — dedi murabbiy.

Kompani, ayniqsa, jamoaning eng yosh hujumchilaridan biri bo‘lgan Lennart Karlning o‘yiniga yuqori baho berdi. Unga ko‘ra, bugungi o‘yin Karlning eng yaxshi o‘yinlaridan biri bo‘lmagan bo‘lsa-da, u baribir doim raqib himoyasi uchun jiddiy tahdid yaratadi:

— Lennart har doim xavfli. Rostini aytsam, bugungi o‘yini uning eng yaxshi o‘yinlaridan biri emas. Lekin u qandaydir vaziyat paydo bo‘lishi bilanoq haqiqiy “qotil”ga aylanadi. Bu xususiyat 17 yoshli futbolchi uchun katta ustunlik. U hali o‘sishda, ammo har qadamida taraqqiyot bor, — deydi Kompani.

Shuningdek, murabbiy jamoa a’zolaridan biri — Alfonso Devisning uzoq tanaffusdan keyin safga qaytgani haqida ham to‘xtalib o‘tdi:

— Fonzining qaytgani hammamizni xursand qildi. Umumiy hisobda to‘qqiz oy o‘tdi. Bu juda katta yo‘qotish edi, endilikda esa biz uchun ulkan plyus, — dedi Kompani.

Myunxenliklar o‘yinidan ko‘rinadiki, jamoa yoshlar bilan tajribali futbolchilar uyg‘unligini topib bormoqda. Ayniqsa, 17 yoshli Karlning o‘sish sur’ati kelajak uchun katta ishonch uyg‘otmoqda.