Bojxona jarayonlarini soddalashtirish qachondan boshlanishi ma’lum bo‘ldi

2026 yil 1 martdan boshlab O‘zbekistonda bojxona jarayonlarini soddalashtirish va biznes xarajatlarini kamaytirishga qaratilgan yangi choralar kuchga kiradi. Bu Prezident Shavkat Mirziyoyevning farmonidan kelib chiqadi.

Xususan, tovarlar bojxona punktiga yetib kelishidan oldin ularni oldindan deklaratsiya qilish orqali bojxona rasmiylashtiruvi uchun yig‘im 20 foizga kamaytiladi. Shuningdek, bojxona to‘lovlarini bo‘lib-bo‘lib yoki kechiktirib to‘lashda dastlabki 14 kun davomida foiz hisoblanmaydi.

2026 yil 1 maydan boshlab yana bir yengillik joriy etiladi: davriy deklaratsiya asosida tovarlarni rasmiylashtirishda bojxona to‘lovlarini mamlakatga keltirilgan har bir partiya uchun alohida to‘lash mumkin bo‘ladi. Shuningdek, avtomatlashtirilgan bojxona rasmiylashtiruvi ko‘lamini kengaytirish ko‘zda tutilgan.

Agar bojxona axborot tizimida xavf-xatar aniqlanmasa, deklaratsiyalar avtomatik tarzda rasmiylashtiriladi. Bu yirik soliqqa tortiladigan import yuklari, davlat tashkilotlari va ulushining 50 foizidan ortig‘i davlatga qarashli korxonalar, shuningdek, tarif va notarif cheklovlariga duch kelmaydigan eksport tovarlariga taalluqli bo‘ladi.