AQSH universitetidagi otishma O‘zbekistonlik talabaning hayotini oldi

AQSHning Rod-Aylend shtatida joylashgan nufuzli Braun universiteti hududida sodir bo‘lgan qonli otishma fojiali oqibatlarga olib keldi. Mazkur hodisa natijasida O‘zbekiston fuqarosi, ushbu universitetning 1-bosqich talabasi Muhammadaziz Umurzoqov halok bo‘ldi.

Amerika OAVlari, jumladan CNN tarqatgan ma’lumotlarga ko‘ra, otishmani 24 yoshli Benjamin Erikson amalga oshirgan. U AQSH armiyasining sobiq harbiy xizmatchisi hisoblanadi. Huquq-tartibot idoralari tomonidan gumonlanuvchi zudlik bilan qo‘lga olingan. Hozircha hujumning aniq sabablari rasman ochiqlanmagan, tergov ishlari davom etmoqda.

Fojeali voqea oqibatida jami ikki kishi hayotdan ko‘z yumgan, to‘qqiz nafar talaba esa turli darajadagi jarohatlar bilan shifoxonalarga yotqizilgan. Universitet ma’muriyati xavfsizlik choralarini kuchaytirganini ma’lum qildi.

O‘zbekiston Respublikasi Tashqi ishlar vazirligi Muhammadaziz Umurzoqovning oila a’zolari va yaqinlariga chuqur ta’ziya bildirdi. Rasmiy bayonotda marhumning yaqinlariga sabr-toqat tilab, ushbu og‘ir yo‘qotish butun yurtdoshlarimiz uchun ham dard ekani ta’kidlandi.

Bu kabi fojealar yana bir bor tinchlik va inson hayotining qadri nechog‘lik yuksak ekanini eslatib qo‘yadi. Muhammadaziz Umurzoqovning bevaqt uzilib ketgan hayoti yurtdoshlar qalbida chuqur iz qoldirdi.