Berlinda Ukraina tinchligi bo‘yicha muhim olg‘a siljish qayd etildi

Berlin shahrida Ukraina prezidenti Volodimir Zelenskiy bilan o‘tkazilgan uchrashuv davomida Rossiya boshlagan jang harakatlarini to‘xtatish masalasida sezilarli ilgarilashga erishilgani ma’lum qilindi. Bu haqda AQSH prezidenti Donald Trampning maxsus vakili Stiven Uitkoff 14-dekabr kuni X ijtimoiy tarmog‘ida bildirgan.

Uning ta’kidlashicha, ehtimoliy o‘t ochishni to‘xtatish bo‘yicha AQSH va Ukraina delegatsiyalari o‘rtasidagi maslahatlashuvlar besh soatdan ortiq davom etgan. Muzokaralarda Trampning maslahatchisi va kuyovi Jared Kushner ham ishtirok etgan.

Stiven Uitkoff yozishicha, tomonlar 20 banddan iborat tinchlikka olib boruvchi yo‘l xaritasi, iqtisodiy masalalar va xavfsizlikka doir qator yo‘nalishlarni atroflicha muhokama qilgan. Uchrashuvda Germaniya kansleri Fridrix Mers ham dastlab qatnashgan, keyinchalik esa o‘z vakilini qoldirgan holda muzokaralarni tark etgan.

«Biz Ukrainada barqaror va mustahkam tinchlikni istaymiz. Oldimizda oson bo‘lmagan masalalar turibdi, ammo olg‘a intilishda qat’iyatlimiz», — deb yozdi Fridrix Mers ijtimoiy tarmoqda.

Ma’lum qilinishicha, 15-dekabr kuni muzokaralar davom ettiriladi. AFP agentligiga ko‘ra, kechki paytda uchrashuvlarga Yevropa davlatlari rahbarlari, shuningdek Yevropa Ittifoqi va NATO vakillari ham qo‘shilishi kutilmoqda.

Bundan avval Reuters agentligi Zelenskiyning jurnalistlar bilan yopiq muloqotida tinchlik masalasida muayyan murosalarga tayyor ekanini ma’lum qilganini yozgan. Jumladan, Ukraina NATOga a’zo bo‘lish o‘rniga AQSH va Yevropa davlatlari tomonidan huquqiy majburiy xavfsizlik kafolatlarini qabul qilish ehtimolini ko‘rib chiqmoqda.

Shuningdek, Zelenskiy 14-dekabr kuni frontning hozirgi chizig‘i bo‘yicha jang harakatlarini muzlatishni nisbatan adolatli yechim deb atagan. Rossiya tomoni esa avval ham bir necha bor Kiyevdan Donesk va Lugansk viloyatlarining ayrim hududlaridan Ukraina qo‘shinlarini olib chiqishni talab qilib kelgan.

Berlindagi ushbu muzokaralar esa uzoq vaqtdan beri davom etayotgan ziddiyatni siyosiy yo‘l bilan hal etish sari qadam sifatida baholanmoqda.