Unai Emeri: «Aston Villa» hali chempionlikka tayyor emas

«Aston Villa» bosh murabbiyi Unai Emeri Angliya Premer-ligasining 17-turida «Manchester Yunayted» ustidan qozonilgan 2:1 hisobidagi g‘alabadan so‘ng jamoaning joriy mavsumdagi haqiqiy imkoniyatlari haqida ochiq fikr bildirdi. Ispaniyalik mutaxassis natijalarga qaramay, haddan ortiq orzuga berilishdan saqlanish kerakligini ta’kidladi.

Emerining so‘zlariga ko‘ra, «Aston Villa» o‘z salohiyatini to‘g‘ri bahollashi shart. Jamoa bu mavsum «Arsenal» va «Manchester Siti» kabi grandlarga qarshi maydonga tushdi va hatto ayrim bahslarda o‘z uyida ularni mag‘lub etishga ham erishdi. Biroq bu holat hali chempionlik uchun to‘liq kurash olib borish mumkin, degani emas.

Mutaxassis raqiblar tarkibi va tajribasiga alohida urg‘u berdi. Uning ta’kidlashicha, «Arsenal» va «Manchester Siti» taktik jihatdan juda puxta, eng yuqori saviyadagi futbolchilarga ega jamoalar hisoblanadi. «Aston Villa»da ham sifat bor, ammo bu darajada uzoq muddatli chempionlik poygasida qatnashish hozircha real emas.

Shu bilan birga, Emeri jamoaning hozirgi natijalarini yuqori baholadi. «Aston Villa» ayni paytda turnir jadvalida 3-o‘rinda bormoqda, bu esa futbolchilarning har bir o‘yinga jiddiy tayyorgarlik ko‘rayotgani, murabbiylar shtabi belgilagan tizimga sodiq qolgani va barqaror o‘yin namoyish etayotganidan dalolat beradi.

Emeri so‘nggi uch yil ichida jamoa barqaror o‘sish yo‘liga chiqqanini, muntazam ravishda yevrokuboklar zonasi uchun kurash olib borayotganini ham eslatdi. Biroq u kamtarlikni saqlash, ochkolar qanday mehnat evaziga qo‘lga kiritilayotganini unutmaslik zarurligini alohida qayd etdi.

«Biz o‘z darajamizni saqlab qolishni istaymiz. Aql bilan ishlashimiz, raqobatbardosh bo‘lishimiz, barqarorlikni yo‘qotmasligimiz va o‘zimizga nisbatan talabchan bo‘lib qolishimiz kerak», — deya Unai Emerining so‘zlarini keltiradi BBC.

Ma’lumot uchun, hozirda «Aston Villa» Angliya Premer-ligasi turnir jadvalida 36 ochko bilan uchinchi o‘rinni egallab turibdi. Peshqadam «Arsenal» 39 ochko jamg‘argan bo‘lsa, ikkinchi pog‘onadagi «Manchester Siti» hisobida 37 ochko mavjud.