Bugundan boshlab Angliya Premer-ligasida 17-tur uchrashuvlari rasman start oladi. Futbol muxlislarini kun davomida ketma-ket qiziqarli va prinsipial to‘qnashuvlar kutib turibdi.
Tur pardasini Nyukasl va Chelsi jamoalari o‘rtasidagi bellashuv ochib beradi. Ushbu bahs Toshkent vaqti bilan soat 17:30 da boshlanadi va kunning ilk intrigasiga aylanishi kutilmoqda.
Kechki paytda esa futbol bayrami yanada avj oladi. Soat 20:00 da bir vaqtning o‘zida to‘rtta uchrashuv start olishi rejalashtirilgan. Ular quyidagilar:
- Bornmut — Byornli
- Brayton — Sanderlend
- Manchester Siti — Vest Xem
- Vulverxempton — Brentford
Turning eng markaziy va kutilgan bahsi esa kechqurun bo‘lib o‘tadi. Arne Slot boshchiligidagi Liverpul safarda Londonning Tottenxem klubiga qarshi maydonga tushadi. Ushbu to‘qnashuv soat 22:30 da start oladi va turning asosiy bezagi bo‘lishi shubhasiz.
Yarim tunga kelib ham futbol to‘xtab qolmaydi. Soat 01:00 da yana ikki uchrashuv muxlislar e’tiboriga havola etiladi. Arsenal Mersisaydda Everton mehmoni bo‘lsa, Kristal Pelas o‘z maydonida Lids bilan kuch sinashadi.
Qisqasi, 17-tur birinchi kunyoq APL muxlislariga to‘laqonli futbol shou taqdim etishga tayyor. Bugun kechqurun televizor pulti qo‘ldan tushmasligi aniq.
